放低導演筒七年的林嶺東憑電影《迷城》重返影壇，他笑言要以「新導演」自居，又指在《迷》片的三位男主角身上找到自己的歷史寫照：「余文樂係我年輕戇居居嘅時候，吊兒郎當，而張孝全係我想殺死人嘅時候，喺江湖行走嘅時候。」提到古天樂（古仔），他笑言古仔有如現時的他，更笑言古仔與他一樣「口水多過『爹（茶）』」。

林嶺東希望港產片能拍出香港魅力。

而林導不希望港產片在本土向荷里活片低頭，就上映排期一事，他說：「喺八十年代，咩係荷里活片？嗰時仲要係史匹保！依家咁渣，仲要避人？」另一方面，林導亦認為港產片有能力拍出香港的魅力，而不僅是商業電影純賺錢，希望電影人飲水思源，在賺「外快」之餘，不忘為港產片努力。