謝賢爆粗怒打曾江

謝賢、曾江、胡楓及Joe Junior演出的無綫節目《4個小生去旅行》昨日舉行記者會，四位小生雖然加埋310歲，但依然精力充沛，期間和兩名俄羅斯籍索女大跳「老舞」，胡楓跳得最High不停轉圈，但跳到一半時謝賢開始面露不悅，並離開獨坐一角。

斥由頭到尾坐輪椅

面燶燶的謝賢被問發生何事，他說：「有高層同贊助商喺度唔方便講。」之後他和胡楓、曾江及Joe Junior一起受訪時，謝賢不時怒睥曾江兼夾雜粗口，Joe Junior服侍周到幫謝賢拎咪，至於曾江則一副「睇你唔到」的態度跟胡楓密密食。謝賢說：「本來係好開心嘅，但係就有個跛嘅（曾江），你跛我哋可以照顧，但估唔到佢要坐輪椅，由頭坐到尾，感覺好似玩弄我哋。尋日我睇報道仲話佢流咗四個鐘鼻血，流四個鐘？你死X咗啦！」其後謝賢望着曾江大呼：「X你老X！你死得未？咁你唔死？」曾江即笑笑口搭嗲：「未死得，打針停咗。」謝賢再寸爆：「即係流四個鐘先打針呀？你坐輪椅條橋係咪度出嚟？X你老X，要成班人推你！我知你好X活躍！」曾江則笑騎騎還口：「唔係！我依家都趷吓趷吓！如果咁好戲就不得了！」

眼見曾江笑笑口，謝賢更火上加油，再大罵：「我知你個人多過佢！你唔好喺我面前耍嘢！」，其後突然起身向曾江「出掌」！由於胡楓坐在二人中間，慘被謝賢的掌風搞到當場飛甩眼鏡，雖然有胡楓「卸力」，但曾江也被謝賢打甩左耳的助聽器。

「邊度都打到你」

謝賢突然動粗，即令全場目瞪口呆，他繼續發炮，指曾江前日在錄音室出言頂撞：「尋日都想打你，但喺無綫嗰度就唔打你！」曾江說：「所以喺呢度打我？」謝賢大喝一聲：「我邊度都打到你！」曾江勸謝賢別衝動，但謝賢說：「X你老X，要成班人照顧你架三輪車，唔X使講，總之你以後唔好見我！」語畢拂袖而去，並說：「我要你知道，唔係個個都畀你恰。」曾江事後說：「冇事！冇事！佢衝動啫！」又指跟對方早有多年誤會，雖曾有拗撬但未試過郁手，並澄清冇詐病：「你估病好過癮？如果有病，只係四個人開心去旅行，但依家多咗啲嘢！」事後記者致電曾江，他說：「冇事嘅！可能我又過分咗，佢又過分咗。（真係打到你喎？）係咩？當時場面咁衝動，冇感覺！（會報警？）黐線！點解要咁做？（握手言和呀？）係都私底下做啦！（等緊謝賢Say Sorry？）哈哈！係呀！」謝賢其後接受電話訪問，問到有否致電曾江道歉，他說：「Say Sorry？叫佢等我入棺材嗰日啦！從來都未試過咁勞氣，實在懲戒佢，佢太不可一世！」他更大數對方「三宗罪」：「錄音嗰陣話我拖累佢，喺導演同監製面前咁講，我仲使撈嘅？對上一次拍完之後已經兩年冇錄音，佢成日都錄，我如果成日錄都快啦！練緊稿佢都爆粗X我，話原本想早啲返屋企但畀人阻住晒！仲要唔耐煩喺度行來行去，又扮晒嘢教我錄音！已經好想打佢喇，係都錄完音先啦，之後佢仲叫我車埋佢返屋企，我梗係拒絕啦！」

「為難」資料搜集員

第二宗「罪」，指曾江拍攝時要全程有專人推車服侍：「拍嗰陣已經忍佢啦！咪由佢玩囉！當時都冇人敢出聲，幫佢推車（輪椅）嗰個做Research 咋，由朝到晚推住佢仲要畀佢喝！」最後一宗罪，是謝賢質疑曾江扮病兼搶鏡：「有日佢煮嘢食企咗兩個鐘都冇嗌痛，擺明扮嘢擺款啦！又成日搶人鏡，佢有本事就唔使壓住人啦！識佢好多年，一路都冇來往，一路都知佢衰格但佢冇改過囉！（會唔會再合作呀？）見都唔想見呀！不過嚟緊仲要宣傳，而且我17號會請食飯，我唔會出聲，佢敢咪嚟囉！（余詠珊好似話會擺和頭酒喎？）冇得和！當識少個人，本身都唔係真正朋友！」

謝賢扯火怒摑曾江，過程充滿火藥味，《東網》就將事發過程、對答，全片長４分２８秒http://goo.gl/6GXFOt原汁原味送上。