周汶錡：餵人奶唔飽 媽媽聲鬧爆
新手媽咪周汶錡日前出席活動時發表「餵人奶唔飽」論，引發網民批評，指摘她的言論令新手媽媽行「母乳路」的信念動搖！周汶錡隨即親自留言「拆彈」耍冧：「自己母乳不太夠，只是擔心BB會不足夠，所以會混合了奶粉！我也十分支持餵哺母乳。」
周汶錡日前出席活動時發表「餵人奶唔飽」論！
周麗淇（左）表明支持母乳餵哺，力撐家姐周汶錡，勸大家不要太敏感。
文：專案組
剛榮升人母的名模周汶錡（Kathy）上月初為法籍老公Julien剖腹誕下混血囝囝Jacques，大前日產後復工出席嬰兒用品活動。剛坐完月已極速收身的她，身形索爆，更分享湊B樂事！提到餵奶問題時，Kathy指Jacques的飲食習慣已改變：「依家開始餵奶粉！其實餵人奶，佢就唔飽嘅，因為你唔知佢食幾多0架嘛！」即引起一眾網民狠批！
發表「歪論」被勸慎言
正所謂「說者無心，聽者有意」，大批網友到Kathy的Facebook留言批評，指Kathy身為公眾人物應慎言：「作為一個公眾人物，請你必須小心一言一行，你一句『其實餵人奶，佢唔飽』係一個非常非常錯誤的訊息！會間接影響新手母乳媽媽行『母乳路』的堅持與信念！」亦指出政府現時大力推廣母乳餵哺：「你可以不公開表態，但絕對不能公開說『歪論』！」有媽媽級網友更說：「你呢句說話，對一眾餵哺母乳到2歲或以上的媽媽們更是很大的羞辱！你意思係佢哋嘅小朋友係冇一餐食飽？」、「人奶＝唔飽，所以要食奶粉，咁就係錯！」、「唔餵人奶係個人選擇，絕對唔會係唔飽，人嘅構造，超乎你我的想像！」
事後Kathy自知失言，即在Facebook親自解釋：「大家好，在此對昨天（6日）的言論，為大家帶來不便！深表歉意！其實我的意思，不是想表達餵母乳會令BB不飽，是因我自己母乳不太夠，只是擔心BB會不足夠，所以會混合了奶粉！我也十分支持餵哺母乳。可能我的言論會引起一些討論，但我是打從心底的關愛自己的兒子，及我會繼續努力嘗試以不同方式以母乳餵哺兒子。最後，再次多謝各位的關注，作為一個新手媽媽，我想，要學習的東西還有很多，但我會繼續努力。」而昨日Kathy接受電話訪問時再次重申：「唔回應咁多喇！喺Facebook已經寫晒，作為一個新手媽咪我會更加油同努力。」
阿妹周麗淇力撐
而身在內地開工的周麗淇亦隔空力撐家姐Kathy，她接受電話訪問時說：「我家姐今次講嘅都係發表自己個人立場，希望大家唔好咁敏感。相信每個做媽咪都好錫自己子女、都好辛苦，希望咁小事唔好引起大家誤會，而我本身都好支持母乳餵哺！」
