C AllStar最啱聽演唱會

文：音樂組

攝：黎志輝

事隔年半C AllStar將於9月2日晚上與9月3日中午及晚上舉行三場《C AllStar C AllLive 2015》演唱會，演唱會將由上次的紅館移師至較細的伊館，四子直言因為從未試過開四面台，今次是小試牛刀的好機會：「都算係一個過渡期，喺伊館試吓開四面台，老闆話今次練定遲啲去開紅館，今次每人都會有Solo，可以熟習吓一個人Handle四面台。」

睇清觀眾反應

雖然場地較細，但勝在人夠集中，四子笑說：「到時望落台捉到邊個唔專心玩電話，就停晒音樂等佢玩完先！」提到上次開騷的「打電話點歌」環節，因為太混亂而搞到一鑊粥，四子笑說：「上次即場打電話好多人打唔通，今次場細細哋，歌迷大叫應該都聽到。」而歌單方面，C AllStar表示會做足「民意調查」，搜集大家最想聽的歌，務求做一個「最啱聽」的演唱會！

同公司傾條件

談到一人一Solo的環節，On仔表示最難是說服公司：「要諗咩歌最表達到自己，諗完仲要去說服公司。」為了證明決心，On仔與公司傾條件，「跑夠數」才可以唱最想唱的歌，他說：「我好想唱楊千嬅嘅《深息》，所以喺七月中時放咗段呢首歌嘅片上網，同公司講好咗八月前有7,015個點擊就會喺演唱會上唱。」最終On仔成功達標，將如願在演唱會獻唱。

服裝：wardrobekshowroom

髮型：zanki@ iHai

化妝：Angel Chan

場地：中環蘭桂坊酒店Azure Restaurant Slash Bar