組合天堂鳥出道以來被批「MK」，惟他們不抗拒之餘，更感激有幸一曲成名！外形高大的三子原來亦遇過情場騙子，希望藉新歌《Playa Hater》對情場玩家作出控訴！ 文：專案組　攝：吳文聰

天堂鳥想作多線發展，做跳唱創作型組合。

天堂鳥再度出擊並推出新歌，揚言重新出發。

組合天堂鳥（BOP）去年憑歌曲《登陸太陽》為人認識，繼而獲封「MK-POP天團」，不過三子坦言不介意這個稱號，反而感激「MK」讓他們闖出名堂：「其實MK嘅造型只係停留喺個MV入面，我哋三個平時着衫都係好Casual，又唔會化濃妝。其實又冇話介意，反而要多謝呢個字眼，因為令到好多人記得我哋！」

Gordon唔敢花心

事隔一年，天堂鳥再度出擊並推出全新廣東歌《Playa Hater》及國語歌《五四三二一》，為配合新歌形象，特意將組合名稱改為BOP，寓意重新出發！

新歌《Playa Hater》講述對情場玩家的控訴，原來隊長Gordon曾做過玩家：「我以前好花心，之後經過一啲嘢，令到我有個大轉變，係時候唔再咁花心。」反而Lincoln及Tyrese則在情場上受過傷，Lincoln說：「讀書拍拖遇過，我好鍾意對方，但原來佢係玩緊我，最後仲話對我完全冇感覺。」而Tyrese則說：「因為受過傷害，所以我依家對愛情好理性，要好謹慎先會再發展新感情。」

填詞「亂咁嚟」

年底推出大碟的天堂鳥將首度填詞，直言難度甚高：「寫歌嘅詞語唔可以求其，但我哋嘅填詞方法係有一手，就係會將首歌聽好多次，當聽到旋律就會亂咁加啲詞，有時誤打誤撞都會有幾搞笑嘅效果！」莫非「MK-POP天團」有意鋪路轉型？他們笑說：「我哋係想多線發展，遲啲MV可能會自己拍埋，到時可以叫我哋做跳唱創作型組合！」

場地：帝家設計　髮型：Kr+ @ Kimrobinson　化妝：GLT Group　服裝：TOUGH Jeansmith