黃婉曼靠床駐顏 李治廷情迷奶蕉

做得藝人當然是情感澎湃，即使是一件物件，已令他們樂翻天，又或是傷春悲秋！在《東網巨星》「巨星最愛：戀物篇」中，李治廷沾沾自喜高呼一生中最愛：「我最愛嘅應該係菲律賓嗰隻細細嘅奶油蕉，係香蕉嘅一種，點解我咁鍾意？因為佢含有豐富蛋白質，有時健完身如果冇時間補番蛋白質，食幾隻奶油蕉已經足夠，佢含有好高蛋白質，卡路里又唔算高，大約係100至200卡路里到，容易攜帶又好食，Workout完加Potein Shake一齊食好方便，非常實用而又好味嘅一餐！」

瞓美容覺排毒

李治廷最愛食蕉，而身材逼爆的黃婉曼則自爆養顏大法是靠張床：「我最愛屋企張床，因為睡眠對女人嚟講好重要，所以我一返屋企就好鍾意黐住張床，睡眠對美容方面好有幫助，瞓得好自然血液循環好，排毒都快啲，皮膚亦會跟住好啲啦！我傷心嘅時候都會即刻跳上床冚埋張被瞓，瞓醒就咩事都冇，所以我真係好鍾意張床同好多謝呢張溫暖嘅床！」

梁雨恩鏢出人生

至於長腿美女梁雨恩原來是掟飛鏢高手，她的最愛是甚麼？你懂的！她說：「我的最愛係飛鏢，呢個運動令我學識咩係不屈不撓，咩係唔放棄。啱啱開始接觸時我都唔知會鍾意到咁，但係因為飛鏢，Go Through咗好多Ups and Downs，明白人係有狀態，需要擁抱呢啲狀態。因為飛鏢令我認識到世界冠軍級嘅師傅，同埋來自世界各地玩飛鏢嘅人，我好感恩生命裏接觸到飛鏢，亦好多謝飛鏢呢個運動令我明白人生嘅道理！」除了李治廷、黃婉曼及梁雨恩外，陳逸旋、張家瑩及呂晶晶都有自己喜愛的東西呢！