周潤發親身上陣升空12米

國際巨星周潤發去年在王晶執導的電影《賭城風雲Ⅱ》中爆肌演出，至今仍為人津津樂道，已「登六」的他今年再瞓身演出耗資2億5千萬人民幣的電影《賭城Ⅲ》，除應付一場被吊高約12米高空的戲外，更將1987年經典電影《監獄風雲》中鍾天正（阿正）一角重現幕前。日前周潤發率領張家輝、吳志雄及曾國祥等，在邵氏片廠搭建成的大型監獄拍攝一場重頭戲，穿上囚犯服的周潤發需要被「炸彈」炸到半空，他在拍攝時被威吔吊高到約12米高，不停扮驚掙扎，模擬被炸開逾10米外。望着被吊高的周潤發，全場工作人員及發嫂都屏息靜看。連拍了兩Take才落地的周潤發事後鎮定地說：「如履平地呀！唔怕，飛天遁地都係咁，好安全嘅！90幾人望住！」

偶像學友扮情敵

對於將《監》片情景重現，他說：「好耐冇返呢個監房喇！王晶領導下咩都諗得出，我哋肉隨砧板上，成套戲都係搞笑，冇咩認真戲，認真就唔係王晶啦！仲有少少似高進咁扮吓傻。（辛苦？）好輕鬆，嘻嘻哈哈又一日，娛人娛己心態就Very Good！今次多咗好多演員仲有我偶像張學友，好開心！佢做我情敵呀！好好睇又期待。」

發記士多「萬歲」

現場更臨時搭建了一個「發記士多」，原來是周潤發和發嫂贊助的飲食區，更請來兩位廚師為幾百名劇組人員提供魚蛋、燒賣及奶茶等港式美食，周潤發說：「雖然裝修簡陋啲，但都食得兩嘴！為大眾謀福祉！我第時演藝事業外會發展呢樣，開幾間發記士多，做食神呀！」其實當年《監》片留下不少經典名句，包括「我大聲講嘢唔代表冇禮貌」及「我叫你食屎狗，食屎狗」等。