麥明詩《港姐任你Like》熱爆領先
今屆港姐已進入白熱化階段，最強娛樂資訊App《東網巨星》日前在Facebook推出《2015香港小姐》民選投票《港姐任你Like》，網友Like爆(1)麥明詩，得票率近39%，與第二位的(10)「翻版朱晨麗」陳靜儀及第三位的(3)「英國碩士生」羅丹虹成為民選大熱！反觀屬大熱的(4)「寸嘴Ada」龐卓欣竟三甲不入，令人跌眼鏡！
大熱的麥明詩贏盡民意，未知能否真的由頭帶到尾呢？
陳靜儀
羅丹虹
文：專案組
月底舉行的《2015香港小姐競選》大玩全民投票選冠軍，一眾佳麗鬥得難分難解，最強娛樂資訊App《東網巨星》近日在Facebook推出《2015香港小姐》民選投票《港姐任你Like》，率先預測哪位佳麗有望戴上后冠！第一階段「巴絲心水」投票反應熱烈，暫時有近39%網友Like爆「十優狀元」麥明詩（Louisa），輕鬆跑出冇難度！緊隨其後的是同樣被睇高一線的「翻版朱晨麗」陳靜儀（Kristi），得票率為21%。至於「英國碩士生」羅丹虹（Ann）則憑7.6%得票率爆冷成為民選第三位，似乎後勁相當凌厲！而第四名的「眼科醫生」朱嘉莉（Sunshine）亦咬到實，有7.3%得票率。
聽網友話增肥
Louisa由首輪面試至今由頭帶到尾，對於暫時領先《港姐任你Like》的「巴絲心水」感到喜出望外，她指有看網友留言，得到鼓勵與支持令她可在壓力中繼續撐落去：「有啲網民話我太瘦，會努力增肥。」她又謙稱不會驕傲，又着網友多鼓勵其他佳麗：「可以由頭帶到尾會鼓舞，但係我唔會驕傲，『勝不驕，敗不餒』，況且Fabcebook嘅Like同決賽民選基礎唔同，所以唔會鬆懈！」
Kristi入三甲增信心
暫時排名第二的Kristi亦感激網友支持：「好開心可以入三甲，我會再做好啲。（有冇信心大增？）有呀！希望大家睇到我嘅進步，其實今日睇港姐主題曲MV都見到自己進步咗，希望決賽當日大家繼續支持我！（你覺得點解可以有咁多Like？）係網友對我努力嘅認可，距離決賽仲有20日，我會繼續努力。」而爆冷打入三甲的Ann表示會更「畀心機」答謝網友支持，卻無懼網友評論：「有網民叫我注意髮型，我希望網民可以畀多啲意見我。（入到三甲會唔會加強信心？）一直都有，唔會鬆懈！」
