o靚模艾美琦(Amy)於書展單飛出寫真,剖白闖蕩娛圈的血肉史,提到前隊友吳婕妤時更感觸落淚,她說:「AD2永遠喺我心裏面!」

Amy望透過出書洗底,搣甩過往的「騎呢」形象。

提起以往的辛酸,Amy不禁落淚。

Amy羨慕前隊友成為整容樣辦。

艾美琦(Amy)今年書展首次單飛出寫真,為有別於一眾挺胸趷籮的同行,寫真集附上個人打滾娛圈的血肉心聲,Amy回望與前隊友吳婕妤的是非恩怨、騎住男人的私影時光時,再次潸然淚下,Amy要鍛煉的似乎不是事業線,而是太易被觸動的淚腺。

注意言行望洗底

Amy自出道起已與「騎呢」二字密不可分,由騎呢組合AD2,到今天單飛出書,她說:「我一出道已經行錯咗,好遺憾喺天橋同Aily(吳婕妤)濕吻,兩個女仔博出位諗出呢個方法,結果反而係障礙。(條橋邊個諗?)一齊,當時太年輕,一心成咗名先,以為咁就叫成功,嗰時乜資源都冇,唯一諗到咁做。(舊年流出你除剩內衣騎住男人影相,做事慣咗不顧一切?)我都好後悔,藝人應注意言行,即使同熟朋友玩都要注意,萬一流出影響好大,被人影到亦控制唔到,惟有做好自己。」

羨慕吳婕妤變靚

Amy口才不俗,只是太眼淺,叫她細數入行遺憾事,她即爆喊說:「我覺得娛樂圈人事好複雜,鬥爭大,行錯一步影響好大,我有做錯過,因為咁失去咗啲朋友,希望今後學識唔好咁固執。(同Aily仲有冇朋友做?)朋友唔一定要成日聯絡,我見佢變靚咗都戥佢開心,我都聽過有女仔想跟佢個樣照整,我都好羨慕,祝佢一切都好!(以後再冇AD2?)AD2永遠喺我心裏面!」