藝人石天欣日前被發現與「Tempo肥仔」肥腸蜜遊荔園,兩人去到邊影到邊,更在經典大象前起舞,惟天欣受訪時矢口否認戀情,並自言不是肥腸杯茶!

穿短裙的石天欣和肥腸開心自拍,舉止親暱。

石天欣細心地餵肥腸飲水,Sweet到呢!

肥腸全程跟實石天欣幫手影寫真,好體貼呀!

石天欣和肥腸等玩遊樂設施期間,不時黐實傾偈。

文、攝:專案組

昔日香港最大的遊樂場荔園重現中環,吸引不少市民到場尋找童年回憶,日前藝人石天欣就被發現與「Tempo肥仔」肥腸孖住遊荔園,儼如一對「小情人」!身穿格仔露背上衣及短裙的天欣,走到小露寶蛋糕擺設時即大擺賣萌Pose,而肥腸則化身攝影師為她拍照留念,其後兩人更頭貼頭欣賞照片。

「大象」前起舞

烈日當空,身穿長袖恤衫的肥腸一度抵受不住高溫,要到附近的攤位前,被霧水噴幾下降溫,天欣見狀亦非常識做,親自以水樽餵水,相當體貼!其後去到園中最經典的「大笨象天奴」時,兩人更懶理途人目光,即興跳番Part懷舊舞緬懷一下!

好仔讚唔停

天欣接受電話訪問時即否認戀情,並指自己不是肥腸杯茶:「冇人可以做到佢女朋友,我哋識咗都差唔多兩年,我唔係佢鍾意嘅類型,應該都冇乜發展機會,但佢係一個好可愛嘅男仔,係個筍盤嚟!(嗰日又會一齊去?)其實有其他公司同事喺度,咁啱大家都喺附近做嘢,所以就約埋一齊去附近拍片。」天欣又透露剛於網上開設頻道,解說當日於人群中起舞一事:「我哋特登着到好懷舊,想扮陳寶珠同奇哥跳舞,但佢跳舞唔叻,所以將會係一條笑片!」