Twins昨日宣傳廣播劇,其中被傳是麥浚龍(Juno)新歌《羅生門》故事女主角的鍾欣潼(阿嬌)死撐否認,更改口風說:「Hello Kitty都幾得意!」對於「冰島之約」更說:「生日都咁凍,仲去冰島咩!」文:音樂組 攝:鄭家俊

阿嬌(左)與阿Sa宣傳廣播劇時,否認是《羅生門》故事女主角。

陳嘉寶明顯比早前消瘦,原來是腸胃炎之故。

組合Twins昨日與陳嘉寶(Anjaylia)、泳兒、鄧麗欣、鍾舒漫及洪卓立等出席廣播劇記者會,期間蔡卓妍(阿Sa)揚言不會與泳兒去游水:「唔會!佢好勁,太勁!」暗示怕平板身材被比下去。提到男友陳偉霆被網民惡搞成《蒙面歌王》參賽者,阿Sa稱未看過影片:「做得娛樂圈都會有好壞評價。(男友有睇?)咁多嘢做仲留意咩!」

唔認冰島之約

談到阿嬌的過氣緋聞男友麥浚龍與謝安琪的合唱歌《羅生門》被指故事女主角影射阿嬌,她即否認:「唔係,我有聽佢講解。(親自講?)聽佢喺網上講。」網民指出線索是阿嬌與女主角不謀而合地不喜歡Hello Kitty,曾表示比較喜歡米奇的阿嬌即突然改口:「Hello Kitty都幾得意呀!(咁茉莉香水呢?)冇呀,各有唔同喜好。」她又指一月生日已經凍,更加不會有「冰島之約」:「依家好少聯絡,好多謝佢帶我上呢個版面,佢依家咁紅。」而大合照時,曾與方力申傳緋聞的阿嬌站在過氣情敵鄧麗欣旁邊,但兩人甚少交流。

Anjaylia病到瘦

同場的Anjaylia明顯消瘦,她表示近日患腸胃炎瘦了6磅,更收到廣告客戶的警告:「有品牌公司例如護膚同化妝品公司警告話我太瘦,如果太瘦就唔用我!拍完劇我去咗旅行,點知食錯嘢跌番落94磅,希望啲客唔好唔用我,會盡快肥番!」又笑言公司對她的飲食關懷備至,像照顧大肚婆一樣,她又希望將來做DJ,效法終極女神周慧敏。