鄧麗欣（Stephy）為自組的索女排球隊親自揀蟀，不少球壇小花都落力爭取最後5個名額，當中不乏美貌與球技並重的嫩口學生妹及長腿女神，令班主Stephy流晒口水！她成功為球隊省靚招「排」，隨時挑選出港版「12頭身排球美少女」！文：音樂組

Stephy跳起扣殺，測試候選球員的實力！

Stephy與隊員為Loey落場揀蟀，少不了切磋球技！

曾是港青排球隊成員之一的鄧麗欣再次追逐排球夢，自組女子排球隊Loey殺入球壇，球隊規模愈搞愈大！她昨日率領球員出席招募活動，為排球隊招攬更多實力派索女，吸引半百球壇新血前來應徵，候選球員勝在「卜卜脆」兼有煞食長腿，年輕代表有12歲、排球比賽經驗豐富的江瓔庭（Mavis），高挑代表則有1米78的長腿女神，選美代表則有前中國小姐柯嘉琪！

專吼高妹流晒口水

身為「至索班主」的Stephy親自落場招兵，聯同其他球員與面試者猜波考「排」，更使出絕招「強力發球」為球隊連奪數分，但一度不小心手軟將排球殺落網。提到是次選拔未見隊中的索模球員，她笑稱要收起最「長」武器：「今日嚟搵熱血、熱心同堅持嘅人選，所以要收埋啲長腿！」

雖然前來應徵的球員不乏睇得又打得之輩，但Stephy透露只有最後5個席位：「依家球員有14、15個，最多加多5個，多啲人練波士氣好啲！」問到入隊條件是否有樣有身材？她笑說：「樣就唔使，身材就要，最好有1米70以上。我冇咁高，所以先搵啲高過我嘅，頭先見到幾個都流晒口水，今日平均年齡係16、17歲。」

點男友做阿四執波

她坦言為了爭取時間練習球技，不惜押後工作，並自爆男友方力申不時探班睇女：「算啦，佢嚟當睇我！（叫佢做助教？）佢唔識，叫佢執波就差唔多！」此外，她透露最近與小方拍攝葉念琛執導的《紀念日》，由邵仲衡及李麗珍飾演壞爸爸與靚媽媽。