譚耀文（阿譚）近期狂打籃球成功減去廿磅肥肉兼操出結實臂彎，他直言誓以Fit爆身材赴內地拍劇「吸金」！他大爆「的起心肝」操Fit的原因，全因被拍檔任達華出口傷「心」：「我返咗內地拍劇後再返香港拍戲，佢見到我就問『你冇嘢吖嘛！你係咪有病呀？』其實嗰時我已經減緊，竟然畀佢正面咁Hurt一句，但好多謝佢呢句說話！」他坦言當時自覺又肥又「論盡」：「我當時仲趕返香港拍戲，喺機場時個行李箱甩手差啲撞到人，我最後捉到行李但拗柴，去到片場演拐吓拐吓嘅角色仲畀人讚專業，其實我唔敢講真係整親，不過咁可以令我更投入拍攝！」阿譚表示稍後將於電影中與郭富城合作，愛上健身的二人更經常鬥Fit：「佢收工後唔理幾點鐘都會做45分鐘運動先瞓，我就學埋佢，大家每日開工前都會Check對方有冇做運動！」

譚耀文積極減肥，成功操出一雙麒麟臂。