胡杏兒抗拒情侶裝

胡杏兒昨日以大中華區代言人身份出席腕錶品牌活動，問到可會送腕錶給男友，她說：「如果大會送畀我，我就送畀佢。（接受情侶裝？）情侶錶OK，情侶衫就搞笑啲，好得人驚！着到一模一樣就唔會，不過佢鍾意襯番我啲色，低調啲好啲，如果唔係畀人笑。」提到日前與一班好姊妹飯敍，她說：「大半年冇聚埋一齊，好難約。（你報喜？）冇，喜係我婚紗店就開，好忙。（第一個自己幫襯？）唔知，都希望係佢哋，可以Sponsor佢哋。（傳好姊妹胡定欣想快啲結婚？）佢事業心好重，好認真工作，最緊要佢拍拖開心，同埋各樣嘢都開心。（佢有冇向你透露？）冇講呢啲，淨係講佢套劇嘅收視，都恭喜佢。（會唔會約埋一齊搞婚禮？）點約？食餐飯都咁難約，隨緣啦！最緊要大家開心冇壓力。」她又表示現時與無綫已沒有合約：「依家係自由身，唔公布得新動向住，目前都係忙我間婚紗公司，冇諗過係會咁忙，我開會開到凌晨5點，忙完呢樣先諗其他嘢！」