於英國拍戲的甄子丹昨日52歲牛一，日前出發時獲太太汪詩詩於機場送驚喜，帶同子女突襲「陪飛」，令子丹感動不已。事後詩詩透露為此計劃了兩星期，期間幾乎穿煲，子丹則大讚全家均是好戲之人。

太太汪詩詩精心送上生日大驚喜，子丹感動得當場送抱又送吻。

一對子女送上蛋糕及Birthday Kiss，子丹笑逐顏開。

Birthday Kiss

昨日「宇宙最強」甄子丹52歲生日，惟因片約在身要飛英國開工，雖然事前已要求太太汪詩詩同行，但她表示工作繁忙推卻，日前子丹起行時亦於家門前兩度與詩詩咀嘴表現不捨，但實情詩詩一早秘密計劃為老公送上驚喜。

偷偷執行李

子丹出發沒多久，詩詩便與子女趕到機場，當時子丹整理行李時，三人突然衝前大叫：「Surprise！」女兒更送上蛋糕，令他反應不過來，只不斷說：「好Surprise！點解嘅？」詩詩見計劃成功即與子女擊掌。及後子丹問他們是否來送機，詩詩即笑說：「同你一齊去英國，你生日嘛！開唔開心？」他聞言感動得連環Kiss太太，場面溫馨。

事後詩詩接受訪問時說：「一路諗緊去唔去，因為啱啱先喺美國返嚟幾日，小朋友有時差都攰，但最後都決定畀Surprise老公。」詩詩透露是次計劃僅得女兒、妹妹汪圓圓、母親及幾名公司同事知悉，她說：「要偷偷去公司做嘢，等佢出去我先可以Pack行李，見老公執行李我不知幾急，只係扮晒冇嘢，試過有幾次差啲講咗添！」

開心又滿足

子丹就大讚家人非常好戲：「真係犀利，太太推咗我之後都冇諗喇，仲諗住今年又係自己一個人過（生日），依家好開心，有Family我就足夠，冇咩生日願望，好滿足。」