藝人蕭正楠在劇集《風雲天地》中與性感爆燈的孟瑤合演夫妻，打情罵俏之餘又有接吻戲，他強調：「係蜻蜓點水之嘛！」似在向女友黃翠如派定心丸，更自爆翠如媽媽看過劇集後，形容他為「敗家仔」！文：影視組　攝：唐豁莊

扮演二世祖的Edwin認為被讚「敗家」是對演技的肯定。

Edwin受訪時不忘向翠如BB派定心丸。

蕭正楠與汪明荃及劉愷威等在新劇攜手合作 。

Edwin和形象性感的孟瑤飾演歡喜冤家。

蕭正楠（Edwin）在《風》劇中扮演二世祖，在黃德斌與劉愷威大演爭產、復仇戲時，他大部分時間都與孟瑤合演鬥氣夫妻，緩和劇集緊張氣氛，他說：「我同孟瑤今次有令人笑到碌地嘅演出，聽講晶哥（王晶）都有話我有喜劇天分，佢嘅笑片我自細就睇，多謝佢畀呢個機會我搞吓笑。」

「敗家仔」有出色

問到與形象性感的孟瑤合作會否尷尬？Edwin即向女友黃翠如派定心丸：「唔尷尬，親熱戲都係蜻蜓點水之嘛！翠如都有睇呢個劇，佢媽咪仲話我扮敗家仔好似，我聽到覺得好高興，因為我嘅角色就係一個敗家仔，好多女性觀眾對呢類角色特別反感，好開心佢哋鍾意睇。（唔怕破壞形象？）角色壞唔晒，尾段會變番好！」Edwin又爆孟瑤被汪明荃（Liza）捉住教廣東話咬字發音，他說：「同孟瑤合作，佢啲廣東話對白令我哋NG！因為實在太好笑，Liza如果在場，會執佢啲咬字同發音，執得好嚴！好彩我就不嬲冇乜懶音。」

向汪明荃學習

問到與汪明荃合作是否不敢鬆懈？他說：「Liza係我哋好榜樣，對每場戲都有要求，好着重同對手溝通，學到好多嘢！（收視輸畀翠如嘅《愛．回家》？）戥佢開心，我叫佢加油，要向張繼聰多多學習，嚟緊《風》劇都好緊湊，講劉愷威知道係我害死佢心愛嘅女人，劇情一樣咁精彩！」