養寵物大把趣事可以講，其他藝人又怎樣分享自己心中最愛？

關心妍：「我最愛係我隻小狗Butter，雖然買咗番嚟唔係好耐，由我喺寵物店帶佢番嚟都好驚，可能佢六個月前喺寵物店受驚，依家佢對我哋每個都有信心、親密咁錫我哋同等我哋返屋企，非常忠心，所以每次出Trip同工作都唔捨得佢，暫時做咗我心中嘅No.1。」

鄭俊弘：「我心目中最愛就係我隻狗仔Riley，我要多謝佢每日無條件嘅愛，無論我有幾唔開心，佢都總有辦法令我開心，覺得好安全，好愛。」

王宗堯：「我最愛我兩隻貓，多謝佢哋令我變乖，佢哋係領養番嚟，出世三星期手板咁大就開始養，一年過去，因為有佢哋，夜晚唔會再亂咁出去玩，冇必要嘅應酬都會盡快返屋企陪佢哋，依家每朝都要攬吓佢哋先出門口。」

姚書軼：「我心目中最愛就係我隻貓，要多謝佢，因為自從養咗佢之後，令我就算一個人留喺香港，都冇以前咁孤單，依家喺屋企都會有佢陪伴，唔會再覺得間屋好空曠。」

李蘊：「我最愛係貓貓，由細到大屋企有養貓，媽咪都養貓，唔知係咪遺傳，所以我好鍾意貓。依家屋企有5隻貓，每隻都唔同性格，開唔開心都會陪我，又唔會太熱情，有性格、有型同得意。我最鍾意貓嘅手同腳軟腍腍，影相最靚。」

黃婉君：「《巨星最愛》我最愛係我嘅狗仔CoCo，幾日前佢過咗身，身為佢『媽咪』嘅我，唔可以（口係）佢身邊陪住佢，攬住佢吸最後一啖氣，我覺得好內疚，我係有少少唔啱，因為（口係）香港工作為主，希望佢明白『媽咪』非常愛佢、掛住佢。」