圈中愛貓愛狗之人多不勝數，在《東網巨星》「巨星最愛：寵物篇」中，「模範情侶」鄧麗欣和方力申不約而同分享養寵物的經歷；雨僑則自爆抱着險死的貓仔漏夜睇醫生，直情似癲婆！　文：專案組

方力申

鄧麗欣

年糕

肥妹

雨僑

叉燒

湯洛雯

養寵物是一生一世的承諾，做藝人雖然忙到不可開交，但返到家中見到愛貓和愛犬，登時把煩惱拋諸腦後，養寵物頓成「愛回家」的動力。今次《東網巨星》「巨星最愛：寵物篇」，一眾藝人分享養寵物的點滴，「模範情侶」鄧麗欣（Stephy）和方力申更不約而同暢談心中最愛就是自己的貓狗。

鄧麗欣說：「我嘅最愛就係屋企隻狗狗『年糕』仔喇！因為佢成日個樣都奸笑，個嘴側埋一邊，個樣又好傻，同埋我每一次做完嘢返到屋企，上樓梯時佢就會好Sweet咁喺樓梯口側住個頭、咬住骨頭等我，呢個畫面就係我每次放工返屋企最期待嘅，令我勁開心，每次都會同佢玩一陣，令心情放鬆嘅，所以佢一定係我永遠嘅最愛！」小方則說：「我最愛絕對係我屋企嘅兩隻貓喇！叫『BB』同『肥妹』，咁點解呢，其實佢哋兩個年紀都大喇！成十二歲，亦有病，我成日驚佢哋時日無多，所以都要多啲時間陪佢哋，同佢哋玩，影多啲相咁樣！佢哋亦都係我由細到大第一次親手養大嘅動物，所以對佢哋嘅愛會更加多同埋更加唔捨得！」

雨僑為「叉燒」變癲婆

前港姐湯洛雯更自爆與愛貓一段情：「我最愛就係我隻貓貓『Boy Boy』，因為佢喺我唔開心嘅時候陪住我，又唔會因為有嘢食先黐住我，係真係鍾意我，所以我都好愛佢。」

歌手雨僑亦高呼最愛就是她的貓貓，巴不得與愛貓一生一世：「我最愛就係貓仔『叉燒』，由我出嚟做嘢陪到依家，陪我渡過好多難關同重要時候，因為佢好可愛同體弱多病關係，所以對佢付出嘅關心係比較多，試過有次佢差啲死，我直情成個癲婆咁抱住佢漏夜睇醫生，如果佢能夠陪我去到一百歲就好喇！」