自小涉足娛樂圈的藝人李蘊透露，現集中火力向電影界發展，最希望能與偶像吳鎮宇合作。自爆從未獻出銀幕初吻的她，笑言亦沒有此打算，又表示與「富二代」男友已有結婚共識，更揚言希望婚後盡快生BB，避免日後有代溝，想得相當長遠！文：名人組

愛情得意，李蘊正全力發展事業闖影壇。

李蘊曾谷胸亮相婚紗騷。

吳鎮宇於《衝上雲霄》系列的演出型到爆，風靡不少粉絲。

明星是不少年輕人趨之若鶩的職業，入行多年的藝人李蘊（Renee）經歷不少風雨，思想比同齡之人較成熟。早前在工作上活躍度較少的她透露，上半年因身體不適而找中醫調理，現時重返工作崗位：「唔知係咪之前天氣差，或者本命年犯太歲，羊年一開始啲皮膚同腸胃就差，搵咗中醫調理身體一段時間。」

對電影有興趣的她自爆，原來從未獻出銀幕初吻：「公司已經着手幫我搵劇本，不過仲未搵到啱嘅角色，可能我嘅底線Set得太高，因為入行咁多年，我仲未獻出銀幕初吻，同埋我真係唔諗住咁做，過唔到心理關口去同一個冇感情嘅人錫，我係一個好傳統同保守嘅女仔。」

有一技傍身

現時新人輩出，李蘊卻極具自信無懼被比下去：「我依家24歲，好多人年輕過我，冇得驚，加上自己識打鼓，有一技之長。（會唔會向打女方向出發？）如果要打嘅就要練下，不過我Prefer打多過咀，（咩人先可以令你獻出？）Sam哥（吳鎮宇）！佢係我偶像，不過都未必一定係咀戲，可以同佢有對手戲已經心滿意足。」她又指對殘障或有缺陷的角色較有興趣，因可體會第二個人生，反而歌手出身的她聲稱唱歌從來不是她夢寐以求的職業。

嫁硬富二代趁早生BB

事業路向清晰，Renee跟蜜運逾兩年的「富二代」男友亦已有結婚共識，她肯定地表示二人均視對方為終身伴侶，信任是雙方相處的核心理念：「佢從來冇過問我嘅工作，（佢會唔會唔想你咁曝光？）佢冇管束我，大家嘅感情關係好健康同開心。（幾時結婚？）一開始拍拖就以呢個做目標，但唔需要趕頭趕命。我對感情好認真，一識佢就覺得思想連接到，不過我都想早啲結婚，可以早啲生BB，將來相處冇代溝同有活力同佢玩，如果日後有小朋友，頭一年我都會堅持自己湊。」

吵架是情侶必經階段，Renee亦不例外：「佢係一個事業型同成熟嘅人，我好尊重佢，但兩個人相處總會有鬧交，通常係我讓步先，我係嗰啲型完就耷晒頭嘅人，自己講完啲傷害性說話就後悔，跟住反省，鬧交真係唔好隔過夜。（點解每次都肯先讓步？）睇個人心態，睇吓你係想同呢個人一世定一陣，想一世，自然就會軟化。」

友情亦是Renee看重的「必需品」，跟「宇宙G.E.M.」鄧紫棋情同姊妹的她坦言二人性格相近而成為好友：「我哋都係硬嘅人，係好姊妹到會鬧交個隻，當然平時會玩得好開心，但有時意見不合都會喊晒，之後感情會更好。」問到如何在紅到上宇宙或有愛人疼錫選擇時，她說：「依家冇得咁揀，佢係有實力先做到呢個位，我冇佢呢個實力，每個人都有自己嘅幸福，我享受同鍾意簡單嘅生活，冇咁大起伏，幸福為主。」

化妝及髮型：Erica, Zoe @ iMAKEUP WORKSHOP

服裝：Ms. Clothing　鞋：Mirabellhk　場地：Prime Sky Lounge