主持陸浩明（六號）最近與教友到以色列旅行，遊歷耶穌走過的苦路、到過哭牆、浸過死海，做飲食節目的他更一試死海之味。六號直指旅途過程為之深刻，唯一遺憾是路過橄欖山時本想拿荊棘樹枝做紀念，卻因太刺手而放棄。

到哭牆朝聖，六號依傳統戴上帽子。

六號遊覽橄欖山及死海。

六號正式與肥媽上契，並獲契媽送上金碗、金筷子及大利是。

拍畢無綫飲食節目《食平3D》的陸浩明（六號），趁放大假隨教會一行四十人到遊以色列，本身是教徒的他對朝聖之行滿懷興奮，雖然不少地方因成為旅遊點而商業化，但對首次到當地的他仍有很大感受。

六號說：「根據聖經記載，耶穌所行嘅苦路有14個唔同受苦位置 ，我行晒，途中見到好多嘢賣，商業化咗！跟住去咗睇死海古卷，當然係A貨啦，真迹擺咗喺博物館！之後去哭牆，跟足傳統男士要戴頂帽，猶太人祈禱又跳舞又喊咁，我就跟唔足，嗰度仲好大風，幾驚頂帽吹走！」

拍慣飲食節目的六號，去到以色列仍不忘「試味」，他浸入死海一刻即試海水味道，結果鹹到覺得苦，要吐出來：「浸落去死海度真係好浮，試下啲海水有幾鹹時，嘩！真係鹹到苦要吐！個團友仲慘，佢畀死海水濺咗入眼，好刺眼！ 」

契媽贈金器

六號表示亦有遊覽耶穌傳教的拿撒勒村：他說「喺嗰度試食倣效二千年前嘅薄餅，好多唔同風味嘅醬，仲試埋當地蔬果，嗰邊土地肥沃，番薯、茄子都好甜。（帶咩返嚟做手信？）其中一日行橄欖山，想帶嗰度嘅荊棘樹枝做紀念，可惜太刺手，攞上手就好易流血，放棄咗。」

陸浩明（6號）前晚正式與Maria Cordero（肥媽）上契，筵開兩席宴請20多位《食平3D》幕後工作人員及兄弟區永權和衞志豪。6號獲契媽送上金碗、金筷子及大利是，更預告將為未來契新抱和契孫送禮物，6號即笑言會落力生小朋友。