俗語有云：哪個少女不懷春？偏偏21歲的年輕歌手丁悅明言暫不談兒女私情，提到過往的愛情經歷，她自爆戀愛時會化身火爆女友，誇張到曾掟爆電視！對於不少藝人為出位各出奇謀，她亦坦承正苦惱如何引起關注。

正值事業搏殺期的丁悅目標明確，暫時拋開兒女私情！

出道第二年的丁悅除繼續做好音樂外，亦希望提升知名度。

新進歌手丁悅正為第二張專輯錄音，她透露有份參與大碟的歌曲創作，故有一種期待自己「親生仔」出世的感覺！丁悅即將派台的歌曲講述一見鍾情，原來現實中她並不相信這回事：「我覺得唔Work，可能我唔係好睇外表嘅人，喺我角度又冇靚仔嘅定義，所以對我嚟講一見鍾情都幾難發生！」

不滿「男友」Check實

談到愛情，丁悅自比女中豪傑，拍拖時不會小鳥依人之餘更非常火爆，曾掟爆電視機：「唔記得嗰次咩事喇，但我覺得信任好重要，試過有個男朋友成日On住Line睇我幾時Online，仲問我做咩Online，呢方面就會令我火爆！」雖然入行後較少機會認識異性，但她坦言現階段不想拍拖：「我成日覺得有咗一邊運，另一邊運就會減少，費事影響我嘅事業運，就唔想搞我嘅愛情運住。」

「黐鬚唱鹹濕歌」突圍

今年是丁悅出道第二年，她坦言不介意被批評，只希望有更多人關注：「就算惡意都唔緊要，咁先代表有人留意你，有時冇Noise仲慘，好似唔存在咁！」但問到是否會以另類方式突圍而出，她即大嘆很矛盾：「有時覺得好奇怪，你騎呢啲會出名，但如果你正正常常或者真係好嘅就可能冇咩人留意，我都明人有時鍾意睇啲好笑嘢，所以矛盾點就係究竟我畀心機唱歌、求進步，定係黐撇鬚唱吓鹹濕歌會多啲人識呢？」她表示暫未能在兩者中作出取捨，卻絕不介意做醜角，只視乎公司是否希望她走這個路線。

髮型：Base@iHair

場地：The Playground