楊千嬅昨日出席海港城舉行的藝術展，她內疚地表示因要還「債」，而未能抽時間陪兒子Torres：「呢個暑假要周圍飛，真人騷仲要飛多一次，又要拍戲同拍廣告，逼晒喺8、9月，呢幾個月都帶唔到佢去玩。」

千嬅笑言每次出埠，囝囝都會含淚望着她。

問到囝囝是否已習慣她經常出外工作？她說：「佢依家懂性會有情緒，會嬲，出門嗰陣，佢會望實，同有兩泡眼淚。」她又指囝囝對着老公丁子高時是第二個模樣：「佢會好瀟灑咁講拜拜，（咁佢咪好傷心？）佢唔會，佢個角色係同囝囝玩，成日好肉緊咁錫佢，阿仔對住佢真係會傻晒。」