英國人氣組合One Direction（1D）成員Louis Tomlinson近日被爆搞大同齡造型師好友Briana Jungwirth肚皮，明年初做老竇，消息令大批粉絲失控，更有人留言生不如死，認真大鑊！

美國傳媒《People》日前獨家爆出現年23歲的Louis「戀搞」好朋友Briana，令對方懷有身孕！報道引述二人好友爆料：「Louis對做爸爸嘅消息開心又興奮，仲認為Briana會係好媽媽，二人最初好意外，但真係好好朋友，生BB會令關係更加親密！」有傳BB將於明年初出生，Louis屆時將會陪在Briana身邊，而現時亦會在巡唱空檔回來陪女友做超聲波檢查，更有意搬近女方寓所，相當廿四孝！

洛杉磯見「親家」

Louis今年3月與Eleanor Calder分手後，曾傳出撻着模特兒Tamara Bell，但她竟非傳聞中的女主角。有指他和Briana今年5月於洛杉磯的好友聚會中認識，外出約會幾度斷正，但僅屬好友而非蜜運。爆料者又指Louis和Briana均對生B感到興奮，現階段以BB與母親的健康為重，更指Briana為人可愛兼關心Louis，並非為名氣埋身！雖然Louis至昨午仍未回應傳聞，但另有傳Louis媽媽Johanna與後父Dan早於美國國慶紀念日已飛到洛杉磯見「親家」，雙方力撐仔女，對喜訊大為支持！事實上，Johanna去年剛生下龍鳳B，Louis可以隨時訓練一下換片技術，而Louis大前年愚人節自爆做老竇的留言亦被翻出抽水！

粉絲揚言送「套」

雖然Louis一家喜氣洋洋，但對不少1D粉絲而言似乎是慘事，大批粉絲於社交網站留言大呻，有人表明死也不會相信Louis即將做老竇，有人則擔心他會離隊或被Briana借上位，有粉絲更表示將來1D開騷會掟安全套提Louis「要有一套」！亦有粉絲傷心欲絕，表示被Louis破壞了人生，正式放棄做人！