楊千嬅、陳柏宇及英皇新人陳凱彤昨日出席放榜打氣大會，千嬅透露早前孖老公丁子高參加內地真人騷時整傷：「好多畫面都好驚險，險象環生同死裏逃生，有少少傷，走咗去照X光。（唔再玩咁激嘅遊戲？）自己都要負責任，潮州人要面子。」又指當年會考數學成績不太理想，未能升讀原校，由於其父是教師，令她大感壓力：「放榜前已同爸爸報定案，自己數學唔叻，偏偏入咗娛樂圈。（畀老公計數？）好多嘢交畀佢計，不過有時大家計法唔同。」她又指會任兒子丁進諾往喜歡的方向發展：「依家起跑線比以前難，但條路多咗選擇。」問到會否不捨得送兒子到外國留學，她說：「睇佢性格，最緊要獨立同自主。」隨即又自爆為兒子申請幼稚園及小學感煩惱：「好煩，佢依家兩歲半，已經面試申請幼稚園同小學。」

楊千嬅自認計數差，故將此重任交畀老公。