城大Karmen麥明詩遇「癡漢」玩轉JR
今屆港姐的12位佳麗日前赴日本特訓一星期，並於昨日回港。(9)「城大學生」郭嘉文（Karmen）一抵港即大爆與(1)「高挑Charlie」麥明詩等一行12人在日本搭JR鐵路時遇上「癡漢」，被嚇到心慌慌，(4)「寸嘴Ada」龐卓欣則自爆被瀛男撩，港姐出埠果然魅力沒法擋，惟化上淡妝的Karmen明顯跌Watt，與力掩疲累、容光煥發的大熱麥明詩及Ada差天共地！
大熱的麥明詩與寸嘴Ada（圖右）到日本依然招惹狂蜂浪蝶，更險遇「癡漢」！
連日來的緊密行程無阻麥明詩（左起）、羅丹虹、Karmen及陳靜儀Shopping掃貨。
略現疲態的Ada（左起）與麥明詩依然省鏡，令皮膚差咗的Karmen被比下去。
寸嘴Ada獲女Fans接機兼有禮物收，男女通殺！
無綫安排《2015香港小姐競選》的12位佳麗赴日本特訓，經過連日的緊密行程，眾佳麗昨日齊齊搭飛機返港，「城大學生」Karmen一抵埗即大爆旅程的驚慌之最：「差啲遇到『癡漢』！因為我哋成班女仔12個出嚟好矚目，第一次喺日本搭JR鐵路時畀人撩兼埋身要求合照，又讚我哋可愛！（當時好驚？）有好多工作人員保護我哋。」「寸嘴Ada」亦透露獲大批瀛男撩：「好多男人問點解咁多靚女！」至於「高挑Charlie」麥明詩（Louisa）則笑言被指「似樣」：「佢哋仲話我哋生得差唔多（樣）！」
「大熱」戰鬥力弱
兩位大熱Louisa及Ada由細鬥到大，相當「有緣」！雖然舟車勞頓後略現疲態，惟仍全程笑容可掬，笑得勁Sweet！反觀Karmen雖早前於化妝環節變靚攞彩，昨日淡妝示人的她即「打回原形」！談到結束外景的感受時，Louisa自嘲不夠戰鬥力：「頭先回程喺飛機瞓到不省人事，喉嚨仲『作病』！」
接下來的選美路依然漫長，問到會否緊張時，Louisa反稱鬆一口氣，Ada則搶答：「喺香港訓練集合時間係朝早8點，喺日本係朝早4、5點，咁之後啲訓練都唔使驚賴床！」問到會否介意常被拿作與Louisa比較，自信爆棚的Ada貫徹其敢言作風：「比賽本身就係比較，大家各有優勢，例如Karmen Catwalk行得好，表現突出！」Karmen聞言即表示在旅程中了解到各人的性格與專長。Louisa則明言毋須「秘密練兵」應付「對手」：「個個表現百花齊放！」Ada亦笑言她們赴日時常在房間互相練習，早已「乜都睇晒」，她更獲一名女Fans接機兼送禮，贏盡風頭！
回港急「救膚」
12位佳麗前晚與工作人員拉大隊到居酒屋慶功時放肆喪食，連日訓練令她們大呻辛苦，Louisa坦言「唔夠瞓」：「返香港最想瞓覺，嚟呢度7日每日瞓少3個鐘，我要每日瞓8個鐘先夠，返香港起碼要瞓番18個鐘！」鬥心十足的Ada則表示已Book健身教練回港做Gym：「想返去食多啲嘢，返去請大家食刺身！最想見到男友，我哋有保持聯絡，有向佢訴苦，尋晚呻到3、4點，佢仲去咗蘭桂坊消遣，我唔介意佢去玩，對佢好有信心，好放心！」Karmen亦表示「唔夠瞓」，更令本身滑溜的皮膚變差：「返香港要勤力啲敷Mask護膚！」
