港姐大熱麥明詩及龐卓欣經不起連日的密集式訓練齊齊跌Watt,反觀部分本來被形容為「毫不起眼」的佳麗經名師指導後成功「變面」!麥明詩及龐卓欣笑稱體力耗盡,但不忘賣口乖讚辛苦有價。 文:影視組

郭嘉文「變面」後電力激增!

朱嘉莉以化妝技巧修飾五官,當堂醒神晒!

龐卓欣不敵連日來的辛勞,疲態盡現。

Michou.悉心指導佳麗化妝,助她們提升魅力。

攝:鄭家俊日本傳真

港姐受訓進入第5日,經過數天的密集式行程後,一眾佳麗疲態盡現,大熱麥明詩及龐卓欣都頂唔住!一眾佳麗昨晨到惠比壽跟導師Michou.學習化妝技巧,6號吳慧堯、9號郭嘉文及12號朱嘉莉成功「變面」,電力激增,將麥明詩及龐卓欣比下去!

學日本妹化濃妝

魅力四射的郭嘉文說:「吸收學咗嘅嘢,我都覺得自己似日本女仔!導師提醒我面色較蒼白,之後化妝都會濃啲。行程雖然辛苦,但絕對大開眼界!」至於吳慧堯亦興奮地說:「雖然任職化妝品公司,但我同呢方面無關,點知依家學識咗仲畀工作人員讚,以後會多加注意!」

至於被指跌Watt的麥明詩不禁狂呻:「平均每日瞓得5粒鐘,以前讀書考試都會畀8小時休息,咁先有充足精神應付。其實我由細到大都少化妝,讀大學多咗社交先上網學,導師話我有高低眉,畫面要平衡番。」龐卓欣亦大呻缺乏休息:「嚟到覺得唔夠休息,眼袋愈嚟愈黑,聽日要再早啲起身,咁大個女最辛苦都係呢個Trip。」她自爆被導師批評畫眉太深,令一直自以為化妝技術尚可的她提升了審美眼光。

真人騷激發演藝細胞

另外,無綫計劃將佳麗在日本受訓的片段錄製成一小時特輯,並安排在下月22日播放,翌日則由曾志偉及鄭裕玲主持真人騷,化身導師訓練佳麗的演藝潛能,港姐總決賽當晚則初定由陳百祥、張繼聰及崔建邦擔任司儀。