前港姐葉翠翠情路幾經波折下終覓得歸宿,與拍拖未夠一年的圈外男友Raymond昨晚擺婚宴,攜手踏入人生另一階段。預告性感的翠翠穿上低胸婚紗晒3吋「事業線」,又手戴四隻戒指盡騷華麗行頭,她透露夫婦已協議先過二人世界,造人慢慢嚟!

翠翠與老公咀足四次,錫面時她更擺出一副冧樣,相當享受。

翠翠與老公切蛋糕,攜手踏入人生另一階段。

翠翠獲奶奶送贈「傳家之寶」玉戒指與珍珠戒指,加上紅寶石戒指與求婚鑽戒,閃爆全場!

翠翠雙手戴滿金器,認真誇張!

翠翠爆老公宣誓時甩甩咳咳,搞到忍唔住笑。

姊妹玩殘新郎,翠翠更要睇住老公「吞蟲」!

婚場鋪滿鮮花及兩人的婚照,夢幻典雅。

採:影視組 文:專案組

現年33歲的前港姐冠軍葉翠翠升呢做周太,與圈外建築師兼公司副董事男友周曉東(Raymond)昨晚在四季酒店擺酒,筵開32席,場內更設Live Band表演!婚宴前,盡騷3吋「事業線」的翠翠與老公一同現身受訪,切完蛋糕後又應要求即場錫面兼咀嘴,雖然只是蜻蜓點水式輕吻,但兩公婆咀足四次晒甜蜜!

彈愛的宣言喊唔出

除了結婚日大解放外,翠翠還大晒行頭,戴上四隻戒指及一對珍珠耳環,又向傳媒大派一百蚊利是!因Raymond是圈外人,不習慣面對鏡頭而面露尷尬神色,翠翠即細心地安排單獨受訪,亦未有透露老公年齡,只願意公開「4字頭」,處處為老公着想。提到行頭勁,翠翠笑言收到七對龍鳳鈪:「爸爸媽媽、老爺奶奶同親朋好友都有送畀我,而四隻戒指當中嘅玉戒指同珍珠戒指呢兩隻傳家之寶就係奶奶送,一隻紅寶石就係朋友送,仲有一隻係老公送嘅求婚鑽戒。」

翠翠分享昨晨「玩新郎」的特別環節,揚言老公排除萬難才娶得美人歸:「我外國讀書返嚟,所以反傳統望住佢哋玩,而前一晚亦冇同老公分開咁過。佢哋學日本節目,放咗啲中藥材好似蠍子、海馬同鹹竹蜂喺吸管鬥吹,我見老公一路都贏,要佢冇咁易就娶到我,剩低嗰成盤藥材我就要佢一個食晒!」但亦笑言老公未有帶給她感動位,令她「喊唔出」:「佢個『愛的宣言』用彈結他代替,但又唔係彈得好,令我笑咗出嚟!之後明明講好要背好誓言,佢又講到甩甩咳咳,我又忍唔住笑!我都驚冇喊會有遺憾,但我到時會講吓同媽咪嘅嘢同埋同老公嘅相處,可能要喊就要靠自己喇!」

感激圈中好友撐場

提到婚後會否開Turbo造人,翠翠透露兩公婆也不心急:「我哋夾好咗想過二人世界先,老公都唔想生住,佢話啱啱先娶個老婆返嚟,唔想自己咁快變第二位,遲啲先啦!」今次邀請前來婚宴的圈中人有兩圍,翠翠坦言感激:「之前媽咪過身,佢哋好有心,所以想請番佢哋嚟飲,有陳凱琳、劉佩玥同歐陽巧瑩等,蔡思貝就要開工嚟唔到。」

另外,一對新人在宴會廳門外擺放兩人Sweet爆婚照,當中不乏翠翠的低胸婚紗Look,又有與老公與愛犬的合照。而場地布置非常夢幻典雅,鋪滿白色、紫色及粉紅色花,浪漫非常!