親情難以用言語表達，到底一眾藝人最愛是哪位親人？他們在這裏娓娓道來：

琦琦

湯怡

張紋嘉

鄭欣宜

鍾舒祺

琦琦：「心目中嘅最愛就係囡囡，要多謝佢令我變得更快樂。記得佢第一次參加朗誦比賽時心情特別緊張，我話贏輸都唔緊要，媽咪永遠都愛你，佢最後攞咗第一名，企喺台上第一時間望住我笑，真係好感恩世界上有佢嘅出現！」

湯怡：「我嘅『巨星最愛』就係Daddy同媽咪，之前母親節我特登打咗段訊息畀媽咪，一邊打一邊覺得依家大個女有時返到屋企都會發脾氣，但佢依然每日煲湯我飲，其實我哋出嚟做嘢都已經係成年人，但佢仲當我係小朋友，打打吓就感觸到喊咗出嚟，好感受到媽媽咁深嘅愛，係時候要回報佢！」

張紋嘉：「我嘅最愛係嫲嫲，我細細個佢已經照顧我，因為父母要外出工作，佢主力照顧我。嫲嫲好錫我，所有嘢都以我為先，喺成長過程中畀咗好多愛我，可惜喺我最反叛時過咗身，冇機會喺長大後回饋佢。我相信前世今生，希望下世用好多愛報答佢！」

鄭欣宜：「我最愛係邱淡素，我婆婆呀！佢係一個得四呎幾吋高同紮腳嘅老人家，但可以轉眼間煮出九餸一湯畀好多人食嘅『能幹婆（上海話）』！」

鍾舒祺：「心目中嘅最愛係家姐鍾舒漫，要多謝佢朝早煮早餐，放工又煮晚餐，工作空檔仲要照顧我，又要執我房入面周圍擺嘅衫！佢依家就好似身為人母咁擔心個女，雖然真係好肉麻，但我好多謝佢！」