歌手王歌慧（Emily）曾是天王黎明（Leon）旗下藝人，當年未夠18歲已經簽約Amusic準備做歌手，可惜轉眼間九年過去，她仍沒出過一張碟，在別人眼中仍是一個沒太多人認識的藝人，生活全靠家人接濟：「如果等我養家就真係慘，一定瞓街，要嚟天橋底搵我。」

出道九年的王歌慧一直處於無名期，對演藝事業仍有憧憬的她，惟有求變突圍。

王歌慧多年來以黎明旗下藝人的身份亮相，今年終告「分手」。

王歌慧（右起）與應昌佑、JW和衛蘭一班同事非常老友。

王歌慧已經「大個女」，行小性感路線都冇問題喇！

談到前老闆黎明曾出言鼓勵，王歌慧笑稱有時要諗吓先明。

Janice Man與王歌慧曾是同門藝人。

王歌慧自認「閒人」，生活要靠家人接濟。

入行以來，外界認識Emily都只限於是黎明旗下的藝人，是衛蘭師妹，直到今年Emily宣布離開一手湊大她的Amusic，回復「自由身」。不過，Emily對娛樂圈這團火還未熄滅，正物色新公司向電影及劇集發展，她笑說：「好彩真係好細個入行，趁依家仲後生，未老得晒出去闖吓啦！」當年黎明簽她做歌手，為何未出過碟？Emily說：「因為佢哋覺得唱歌難聽唔緊要，可以去學，但其實真係講天分，可能我聽音唔係好準，學咗幾年，發覺都係唔應該嘥時間喇！」雖然沒繼續學唱歌，不過Emily當時自掏腰包到北京學演戲。

無所事事 靠家人接濟

回顧九年以來就只拍了幾部電視劇，Emily不諱言工作量寥寥可數：「係呀！（有冇同公司反映過？）每間公司作風都唔同，有啲公司係為咗Keep住藝人曝光率乜都接嚟做，而Amusic係一間重質不重量嘅公司，唔可以只話係公司問題，我自己唔夠主動都係原因，所以依家我同自己講會好努力，追番嘥咗嘅時間。」問到家人可有奇怪做藝人何解無所事事？Emily尷尬又坦白地說：「其實超多人覺得我超得閒，啲朋友都以為我唔做，而屋企人就覺得我究竟做緊啲乜，好擔心我，呢樣嘢都令我好大壓力。」Emily又慨嘆：「我唔係鍾意唔做嘢！但冇嘢做嘅情況，唔係一個或兩個月，係用年去計。」

Leon：人人都等緊運到

幸好Emily家底不差，父親在內地做生意，生活多年來有家人「接濟」，不愁衣食：「咁我都想賺到錢養自己，如果等我養家就真係慘，一定瞓街，瞓天橋底搵我做訪問，跟住買埋個飯盒畀我。」她指家人最擔心並不是其賺錢能力，而是憂心她的前途，Emily自爆試過不開心到忍不住在Leon面前喊：「佢有開解我，佢同我講，每個人都要等，人人都等緊運到，佢都一樣要等。（你聽得明？）有時明，有時要隔一排諗番先明囉！」

與Leon相處多年，到底他是否好老闆？Emily說：「有好有唔好，好嘅地方係佢好保護旗下藝人，亦好公平畀機會我哋，但做唔做到係需要好多方面配合。（但藝人走完一個又一個，Janice Man（文詠珊）、衛蘭、應昌佑都走晒，好嘅話又點會走？）其實我真係唔識答你，一年前同公司都有傾過發展問題，大家都有互相努力過，Leon話齋好似拍拖咁，唔係段段都會白頭到老，可能緣分到就要分手。」Leon曾形容他的公司是中轉站，並不是榨汁機，旗下藝人有毛有翼就應該要自由飛走，不會榨乾藝人，Emily笑說：「我都冇毛嘅，亦唔見有翼。Leon做過藝人，佢知會有乜問題，唔會見你冇嘢做就掟你返內地做騷。」

大個女喇！性感冇難度

90後的Emily早於2006年入娛樂圈，她慶幸早入行，現在還是「二字頭」，對娛樂圈仍未死心，希望繼續向電影圈進發，亦不介意走性感路線：「以前都有導演想搵我拍戲，要一啲大膽嘅演出，但公司幫我推咗，我明白嘅，嗰時我年紀都係細，真係未必適合，但我依家大個啦！電影上面底線可以低啲，當然唔係過分暴露啦！情慾戲就視乎劇情需要去決定！」

後記：一定要變！

25歲的Emily終於不再小妹妹，由打扮到思想至少給人有大個女的感覺。可能經歷九年在娛樂圈「似星非星」的日子，她這樣的「無約藝人」要繼續在娛樂圈生存，一切就只得靠自己。在訪問過程中，Emily不時強調過去「一事無成」都怪性格影響命運，乃被動又不進取所造成，真是「天王都救唔到」！所以，Emily多次同自己講一定要變，要變得積極主動，才會有出頭天。