黃宗澤(Bosco)將與鍾嘉欣合作新劇,他透露二人僅有搞笑戲份,反指羨慕黃浩然與朱千雪有不少激情場面,他又自爆在劇中被狗咬屁股!

出動私伙風扇仔降溫的Bosco,自爆劇中被狗咬屁股。

穿上牛仔褸的Bosco與黃浩然在街頭拍劇,熱到不停抹汗兼除衫。

以西裝上陣的黃浩然,睇見都熱!

無綫藝員黃宗澤日前以一身長袖牛仔褸打扮現身旺角,與黃浩然一同拍攝新劇《警犬巴打》。炎炎夏日,Bosco甫落車已難敵高溫,急急除去牛仔褸,並出動私伙風扇仔降溫。

Bosco透露,在新劇中與飾演情侶的鍾嘉欣有搞笑的親熱戲份,問到會否有肉搏場面,他笑說:「暫時未見到。(期待親熱戲?)觀眾期待啫!我哋都係做嘢。」他反指與警犬有不少對手戲,更會有遭狗仔咬屁股等畫面。

贊成公司捧新人

談到胡杏兒及吳卓羲等約滿後不續約無綫,Bosco說:「又唔係息影,大家都喺呢個娛圈拍戲,我覺得冇所謂,經理人公司咁多間,最緊要係合作關係點。(公司力捧生力軍?)梗係要啦!唔通叫我演啲21歲嘅偶像咩,當然要不斷有新人出現,你連睇我十套戲都唔想再望我啦!(想同新演員合作?)都希望有新火花,千雪咁啱都喺套劇做我個妹。」Bosco又爆料指朱千雪與黃浩然有不少親熱戲:「佢哋咀戲同床戲乜都有!(羨慕?)都唔知係咪浩然畀咗錢編劇,咁益佢!」