「肌肉型男」何浩文（Dominic）於電影「凸」圍而出，一副無懈可擊的爆肌身材更成為城中熱話。原來Dominic平日除了健身外，亦非常沉迷氣槍玩意。一玩上癮的他更有不少珍藏，至今收藏量達二十支！

何浩文迷上玩氣槍，但被訓示後，學識「錫住塊面」來玩。

何浩文試玩hi-capa 5.1短槍。

ACR長槍是何浩文收藏之一。

藝人何浩文（Dominic）在電影《鴨王》中突破性的演出，其弗爆身材成了眾人焦點及討論話題。平日除了健身，他亦非常沉迷玩氣槍，自言早於六年前愛上氣槍射擊運動，他說：「六年前有朋友叫我試玩，嗰次之後就上咗癮！不過嗰時未開始買槍，係玩多咗之後，就真係頂唔順，仲記得第一次買嘅係HK416嘅入電長槍，由嗰支開始就上咗癮，一路係咁買、係咁買。之後買咗支手槍P226，嗰款喺好多戲入面都出現過，之後又再買，一路儲吓儲吓就到依家差唔多有20支槍。」

最驚整花塊面

由玩氣槍到收藏氣槍，Dominic自爆全因張國榮主演的電影《鎗王之王》令他對氣槍的熱愛一發不可收拾：「嗰時睇咗哥哥拍嘅《鎗王之王》，真係迷到癲，日日都要揸吓槍咁滯！」他更指氣槍最令他着迷的，是那種「痛的感覺」：「刺激就唔使講啦！最正係嗰種痛，即係畀人射到嗰吓，嗰時會勁嬲，好想報仇，但呢啲感覺喺走出氣槍場之後就冇！而且呢啲仿製品其實都好真吓，個感覺就好似真係拎住把槍射擊咁，好正！」

問到家人對他的嗜好有否意見，Dominic則笑指公司老闆才是最着緊那個：「屋企人冇咩，不過老闆就擔心我整花塊面，搞到冇得撈，成日都叫我唔好玩咁多！」他笑指老闆一番話成功嚇倒他，並因此減少了玩氣槍的時間：「佢講一講，我又驚，所以都玩少咗。就算真係玩都會戴晒全副裝備，Full Gear上陣！不過有時啲防護措施太勁，玩得冇咁盡興，但我點都唔會放棄氣槍！」

Studio放置槍靶

氣槍發燒友Dominic不但常相約一班「槍友」開戰，連自己的Studio亦有放置紙牌槍靶，以供平時癮起之用！他補充說：「氣槍好得意，平時唔郁吓佢、維修吓，佢會壞，啲齒輪同零件會老化，所以間唔中要玩吓、掃吓塵咁！」

揚言非只為玩的Dominic，指玩氣槍亦有助他的演藝工作：「氣槍同真槍嘅構造真係好似，咁當然唔係100%，但係拆槍、開槍等各樣嘢都可以照番平時咁套用落去，咁就會易啲上手！所以我覺得玩氣槍對演藝工作都有幫助！」

部分珍藏氣槍

ACR長槍

生產年份：2006

原產國：美國

類型：突擊步槍

電影代表作：《戰地風雲3》、《孤軍雄心》

AUG長槍

生產年份：1978年

原產國：奧地利

類型：突擊步槍

電影代表作：《戰地風雲4》

SIG－P226手槍

生產年份：1984

原產國：德國、瑞士

類型：軍用型半自動手槍

電影代表作：《蜘蛛俠：驚世現新》、《轟天猛將》、《美國狙擊手》、《美國隊長2》

長槍HK416

原產國：德國、美國

類型：突擊步槍

電影代表作：《追擊拉登行動》、《特種部隊》、《義勇群英之毒蛇風暴》、《白宮淪陷》