羅霖34D魔女胸招人妒

現年50歲的羅霖（Candy）即將推出首本個人寫真集，相隔24年再以水着示人，當中激罕的火辣水着照在《好報》首度曝光後引起極大回響，她說：「好多謝《好報》幫我做咗封面，好榮幸，真係好多人睇，好犀利呀！」她更透露昨日有年輕女性打量其34D、25、34魔鬼身材：「搭𨋢時有兩個廿幾歲嘅女仔望住我個胸，話『都唔係好大啫』、『睇唔出』，搞到我好尷尬。」

她表示寫真中只有兩款水着造型，該款已是性感之最，可算是其封胸之作：「呢本寫真係首本，亦係最後一本，50歲着水着已經係我嘅性感底線，就算再出都唔會有咩突破，所以唔會再影。」她透露以「美魔女」姿態出寫真集，是想分享女人當自強的訊息：「喺街有男士走嚟鼓勵我，令我好感動。」離婚三年，Candy努力工作，更榮升老闆娘，除了經營紅酒及美容生意，更洽談娛樂界生意：「依家搵錢至上，為咗三個仔，知道自己年紀唔細，為咗啲仔日後生活安定，趁住搵得幾多得幾多。（冇時間拍拖？）為咗三個仔推咗機會，放自己喺最尾。」

朋友封做偶像

對於首次拍攝寫真集，Candy表示有朋友封她做偶像：「有朋友特登打嚟講，真係受寵若驚！唔使封做偶像咁大件事，只係身材Keep得好。」她透露寫真集未推出已賺了6萬元，並將全數捐予慈善機構。提到寫真集請來韓星姜耀煥助陣，原來當初她是想邀請張赫當男模：「原本價錢同檔期都傾好，不過撞咗佢工作檔期。」又指雖然與姜耀煥語言上無法溝通，但大讚對方工作態度認真：「每影一套衫，佢會過嚟睇我着咩色，再去襯番我，亦有讚我『You are pretty！（你很漂亮）』合作得好開心。（揀韓男拍拖？）雖然依家韓國男士冇上一代咁大男人，不過自己鍾意外國華人ABC多啲，思想較開通，唔會介意年齡、有子女同對娛樂圈女性戴有色眼鏡。」