中國3D數碼公司老闆蕭定一與太太陳敏「三年抱兩」,已育有一女的他們將再次榮升父母,現時懷雙胞胎至第37周的陳敏被拍得「肚大如籮」的照片,迅即成為網民熱話!阿一亦戥老婆辛苦,承諾產後會好好「獎勵」對方。

陳敏、蕭定一

選擇自然分娩

據悉,陳敏預產期為本月26日,夫婦兩人身為基督徒,故她選擇自然分娩,加上最近天氣酷熱,認真難為了媽媽!阿一接受電話訪問時說:「雙胞胎係男仔嚟嘅,每個BB已經有7磅幾重,爺爺負責改晒名喇!遲啲先公布。太太近兩個月冇出過街,屋企分開兩層,佢差啲落唔到樓,每晚瞓覺想轉身,起碼要花十幾分鐘,佢手手腳腳仲好幼,可想而知挺住個巨肚幾辛苦。(點獎勵佢?)其實難喎,佢咩都有,最想要都係我,所以我每晚都早啲返屋企陪吓佢。」認真Sweet爆。

阿一又指雙胞胎到來打亂他們的陣腳:「本來以為得一個,依家咩都要改雙份,好彩囡囡好乖冇呷醋。(再追?)唔會,決定封肚喇!點都要有番啲我哋自己嘅生活嘛!(網民質疑個肚大得誇張喎?)唔好話佢哋,我都未見過,真係好神奇。」