唐韋琪喚醒童真歲月

兒歌歌手唐韋琪（Vikki）繼去年舉行以短劇形式進行的兒歌演唱會後，今年再接再厲，於八月舉行兒歌演唱會。

她透露今次演出有別上次，最特別之處是會有「勁Band勁舞」，除有樂隊助陣外，更會有不同年齡層的兒童載歌載舞，希望大家緬懷童真歲月。

《龍珠》兄弟演唱

Vikki並不覺得小朋友現時較少機會接觸以前的兒歌，她認為家長會選擇一些經典兒歌讓子女聆聽：「今次我哋有訓練啲小朋友演出，佢哋一聽到以前啲兒歌就好開心，當新歌咁去聽，好快就已經背晒，仲好受落，好似傳咗去下一代咁，希望都可以繼續將聽兒歌呢種精神傳落去！」

此外，Vikki今次亦邀請到主唱《龍珠》主題曲的張崇基、張崇德兩兄弟擔任演唱會嘉賓，兩人認為成年人亦有需要聽兒歌：「每個人都有童真嘅一面，人愈嚟愈成長，就發覺好想有啲地方去搵番自己嘅童真，所以兒歌係大人細路都啱聽！」

一年一次兒歌騷

近年與兒歌有關的活動少之又少，問到Vikki可會每年舉辦兒歌活動？她透露早於十多年前、剛加入兒童節目時已有此打算：「其實一直部署緊，不過冇Budget囉！我嘅資源就係儲番嚟，好似人力上嘅，即係叫人幫幫手，有心嘅一齊搞多啲活動，等多啲小朋友同大朋友可以分享到兒歌。我嚟緊都希望每年搞唔同主題嘅兒歌演唱會，可能棟篤笑加Musical，就會豐富啲、多元化啲，亦都畀到平台啲小朋友去表演！」