身高5呎8吋的女星郭思琳曾在韓國贏得模特兒獎項，天橋路上丰姿綽約的她去年闖影壇，有機會顯身手做打女！弱質纖纖的思琳原來是武林高手，研習詠春多年，她坦言想挑戰林青霞的經典反串做東方不敗。

郭思琳自小已跟父親練習詠春。

郭思琳想同子丹合作，大讚對方好型。

林青霞飾演的東方不敗是一個經典角色。

有多年模特兒經驗的郭思琳身材高挑樣子省鏡，去年踩入影壇，但並非演端莊淑女，反而是在錢國偉執導作《辣警霸王花》中飾演女警拎槍殺敵晒功夫，原來思琳的父親是詠春高手，她亦自小開始練武：「爹哋想我哋跟佢學詠春，細個已經大髀夾網球Hold住紮馬動作同埋練習黐手，有時會瘀晒，但自己幾Enjoy！我都想做一啲打女、運動型嘅角色。（想同邊位武打明星合作？）一定係甄子丹，細個已經有睇佢嘅戲，近年最鍾意係《葉問》，因為講詠春，覺得佢打功夫時個樣同眼神好型！」

小三Puppy Love

至於最想挑戰哪種打女角色？思琳表示對女俠情有獨鍾，最欣賞是林青霞的經典角色東方不敗：「覺得青霞個造型好有英氣，男女通殺，演技亦正亦邪，好到位！」

思琳遺傳父母良好基因，加上喜歡打排球及跳高，小學時已長得相當高挑，學校排隊經常企最後一排，她表示很享受高人一等的感覺：「細個已經想高啲喇！覺得女仔高瘦係靚，似公仔！」當時她更仰慕比她更高的同學，小三時發展了一段Puppy Love，她笑說：「大家住上下層，佢會送我去補習社，其實未知咩係拍拖嘅，但覺得佢好特別，當時佢高過我，不過搞笑嘅係最近撞番，我依家高過佢。」