填詞人陳詠謙最近踩過界轉型做歌手，師傅黃偉文（Wyman）義不容「詞」送上大師級作品，而曾為陳奕迅（Eason）巡唱擔任和音的阿謙，最希望能「反客為主」與歌神同台合唱！

由填詞人變做歌手的陳詠謙獲不少朋友支持。

陳詠謙（右）最希望能跟偶像Eason合唱。

陳詠謙最近翻唱了寫給吳雨霏的作品《告白》，今次由填詞界進軍幕前，決意為事業來個反高潮，一切由他失意時講起，他說：「幾年前有次喺海邊寫緊歌詞，寫到沮喪，因為監製係咁叫我改，我就打畀一個唱片公司嘅朋友講：『不如我自己唱埋啦！』我朋友好似智者咁同我講『未係時候，專心啲寫詞』。」

曾做歌神和音

結果這位熱心朋友向唱片公司老闆推薦，最後成功促成合作圓阿謙歌手夢，原來他文筆有水準外，唱歌亦難不倒他，他曾是Eason「背後的聲音」，為歌神的巡唱擔任和音。如今成為歌手後，他最恨與Eason及老友周柏豪合唱：「首先我覺得點都應該要同周柏豪唱番隻歌，同埋好想可以有日同偶像Eason企同一陣線，一齊合唱，難以想像我到時會有幾開心！」

歌手朋友支持

今次阿謙出道派歌，不少曾合作的歌手朋友都相當支持，而師傅Wyman當然以行動來支持這位徒弟，阿謙說：「我同佢講話『如果我唱歌，真係好想得到你一份歌詞。』佢叫我第一隻作品要出自己歌詞先，同埋呢啲愚蠢問題唔需要問，佢當然會幫我寫。好多謝佢，因為冇佢，就唔會有我嚟到今日，加上佢冇反對我唱歌已經係好大支持。」