劉俐去年年底約滿後，未有與無綫續約，卻一早搵定後路，投資點心生意，更自誇有敢於嘗試的冒險精神，冇有怕的她說：「做得生意又樣樣都唔敢博嘅話係冇可能成功！」

劉俐搞生意，另闢財路！

劉俐揚言如果有好劇本會考慮接拍。

劉俐

自去年底約滿，與無綫結束賓主關係後，劉俐坦言已淡出幕前工作半年有多：「完咗約之後，都有成半年時間冇做幕前嘅工作喇！都算係休息嘅狀態。想唔想返幕前拍嘢就順其自然啦！如果真係有好嘅劇本同Job都可以考慮。」

落舖頭食唔使煮

約滿後，劉俐另找後路，決意搞點心生意，做個女強人，她認為做生意與做演員同樣能給予自己滿足感：「搞生意同拍嘢畀到我相同嘅就係滿足感，一樣好開心！但係幕前嘅嘢好多時都係你受人安排，就好似劇本，都係人哋去提供畀你，但係搞生意就真係要自己一手一腳去搞，去諗新意！」

談到為何選擇做飲食生意，劉俐稱並非一時興起：「本身如果我要揀我都會搞飲食，以前都有諗過！因為我真係好鍾意食嘢，我又覺得開間嘢食可以賺錢之餘，仲可以成日嚟食，唔使咁麻煩喺屋企煮飯，又幾好喎！」

搵資金較困難

劉俐自誇有冒險精神，搞生意自然要落足本錢：「搞得生意我又唔會去驚，冇諗咁多。因為真係想咩都做吓，咩都試吓，如果做得生意又樣樣都唔敢冒險嘅話係冇可能成功。要敢去博，我好有冒險精神！開頭比較困難係收集資金，多得我Partner係做飲食，佢好識處理，真係好感激佢！」