「打」甩柔弱印象 楊秀惠再見花瓶

楊秀惠回憶《天眼》拍攝，她表示與陳展鵬的打鬥場面印象最深：「我畀人嘅感覺斯斯文文，其實私底下好粗魯、好揪得！呢套劇Show到我每一面，有一場我要扮師奶，開心到不得了，平時生活要顧住形象唔會咁見人，喺Drama入面滿足自己嘅扮嘢癮真係好正！」她為精益求精一直鍛煉體能，並感謝導師悉心教導，她對成果很滿意：「我會請教佢哋點打先靚，現實中未必好打得，起碼鏡頭拍出嚟好睇，好多謝呢班老師令我打好個基礎，今次我好滿意，工作人員睇到場戲同我講：『秀惠，真係估唔到你咁打得！』」

我愛肥膏

除《天眼》的「韓晨」外，秀惠亦揀選了《仁心解碼》「肥妹家碧」作為代表作之一：「當然仲有四葉草，因為呢套劇我先有機會嚟香港，令觀眾認識我，到近幾年嘅角色都令我實力發揮出嚟！至今最大嘅挑戰係扮肥妹，化妝要兩個鐘以上，落妝又個幾鐘，真係有啲崩潰。皮膚休息亦唔夠，好彩監製好錫我，畀我拍幾日就休息一日。呢撻肥膏仲好貴，我好感恩有機會做呢個大製作！」

等機會反串

秀惠將於新劇挑戰智力發展較慢的角色，她初看劇本時曾擔心演不出神髓：「導演同監製畀好大信心我，試完造型，佢哋仲笑我根本就係做緊自己！另外我好想試吓扮男人，我一直畀人嘅感覺好Lady，好想有機會反串，以前袁詠儀都試過，我都想令人覺得我都有好Man嘅時候！」曾與視帝郭晉安、鄭嘉穎及陳豪合作，秀惠笑言陳豪最搞笑，令她多次NG：「安仔成日笑令人覺得好安心，零壓力；嘉穎外表好Cool但好肯教人，陳豪係個好好先生兼爸爸，我從來都唔知佢咁搞笑！佢將每樣嘢都變成笑話，令所有人喺充滿歡笑嘅工作環境拍嘢，同佢拍《鬼同你OT》日日都令我喪笑！」

滿足現狀

入行逾十年的秀惠坦言恨得獎，但她對得失亦相當看得開：「每年每個獎，上台攞獎嘅得一個，咁拎唔到獎係咪代表做得唔好呢？過去呢十幾年，我Overall幾滿意，有起有跌，塑造今日嘅我！我都試過想放棄，頭幾年好辛苦，嗰種辛苦唔係一般人會知！尤其心理上嘅無形壓力，做呢行成日被當成茶餘飯後嘅話題，當時我未識點處理，係好唔開心，慢慢開始學識調節心情，覺得你當我係話題都好吖，好過大家唔記得我！」

最愛收花

秀惠拍劇之餘亦要搞美容生意，時間被工作填得密密麻麻的她，笑言很擔心找不到真命天子：「但如果冇人要我，自己經濟又唔掂咪仲慘！」

她又分享最愛的禮物，原來她是個愛花的女人：「以前中學有Rose day，某個Club會賣花畀同學，仲會幫你送埋畀對方，可能喺你未到課室前放喺你枱，又可能上堂上到一半有人嚟敲門叫你出嚟收花，成件事好浪漫好Surprise！讀緊書嗰時男友激嬲我，我又唔見佢，又唔聽佢電話，佢送咗99朵玫瑰嚟我樓下想同我道歉，連我阿妹都幫佢求情！我開心嘅係佢知自己做錯，識得花心思彌補！人大咗，我仍然鍾意花，但唔會強迫對方一定要送，好簡單食餐飯，一齊喺屋企睇套戲已經好Sweet。」

學男神周潤發做人

這月來人人都爭相「我愛發哥」，楊秀惠亦趁機向周潤發高呼愛的宣言：「我好鍾意發哥！佢由演技到個人嘅性格都係好值得我去學習！我一直都當佢係榜樣，唔需要同佢有對手戲，就咁企喺佢身後做一個臨記，我都OK！」

後記：為老竇入行選美

楊秀惠透露當初選美全因一片孝心，不想再靠父蔭，事實上她從未想過入行：「當時我大學讀生物科，呢科好貴，我覺得老竇畀咁多錢我讀書，我淨係識讀書玩、讀書玩，老竇就咁辛苦供我同阿哥讀大學，我個心好唔舒服，好想搵啲錢，起碼照顧到自己先，當時知道選美有獎金，覺得係個唔錯嘅機會！」