父親節快樂！娛樂資訊App《東網巨星》推出「巨星最愛─父親節篇」，各位紅星透過《巨星》向至愛的父親，把未曾講的情深說話，一一娓娓道來。

蔡穎恩

洪卓立

方中信

蔡思貝

劉青雲

洪杰

蕊蕊

莊思敏

黎虹讌

周國豐

姜麗文

趙茜

蔡穎恩：爸爸好錫我同妹妹，好畀心機畀一個溫馨嘅家我哋，令我無憂無慮生活同長大，我知佢身體唔好，所以我想話畀佢知，I Love You Daddy !

洪卓立：我爸爸係個好少講嘢嘅人，但佢好錫我哋，我爸爸好少朋友，以為佢係唔鍾意識朋友，但原來佢覺得識朋友需要應酬，應酬就要使錢，佢情願慳番啲錢畀屋企，好過自己用咗佢。

方中信：我最愛嘅人我爸爸，佢教我好多人生道理，一定要真誠，雖然爸爸有啲蠢蠢哋，但覺得佢教我嘅嘢，令我喺呢個圈做咗咁多年都交到一啲朋友，朋友亦都對我好真誠，覺得爸爸教育得好。我唔識轉彎抹角，唔識講嘢令人舒服，但真誠待人係好嘅。

蔡思貝：喺我24年嘅人生裏面愛嘅嘢有好多，但最愛都係嗲哋媽咪，因為如果冇佢哋就冇我，冇我嘅話就冇咁多經歷，佢哋一直都好支持我，亦畀好大自由度我，又供我去外國讀書，認識呢個世界。

劉青雲：我最愛嘅係我爸爸，因為當年係佢叫我讀訓練班，爸爸畀我感覺好嚴格，細細個已經好怕佢，我知佢好錫我，到今時今日能夠喺電影方面有成就，覺得好激動，諗番如果唔係爸爸，我都未必入行。

洪杰：細個時候，爸爸希望我有個好的讀書環境，所以移民美國。讀完書大個咗，佢哋知我鍾意唱歌，想返香港發展，畀我返香港嘗試完成夢想，有迷茫的時候，但佢哋都非常支持。

蕊蕊：我最愛爹哋，佢都好錫我，喺屋企媽咪做『壞人』，管得我好嚴，爹哋就次次都維護我，返學放學總係爹哋接我，細個我想食糖媽咪唔畀，都係佢偷偷哋畀我食，就連考試唔合格，都係佢幫我簽名，瞞住媽咪，到依家每年父親節，就算幾唔得閒，我都會陪佢過父親節！

莊思敏：我心目中嘅最愛就係我嘅爸爸媽媽，因為有佢哋先會有我，我要多謝佢哋將我養到咁大，非常感激！

黎虹讌：我最愛爸爸，多謝佢由細細個開始就咁錫我，我做咩事都咁包容我，爸爸年紀開始愈來愈大，但仍要咁寵愛我，好想多謝爸爸。

周國豐：最愛我爸爸（周啟邦），多謝佢畀心機教育我，雖然依家佢唔喺我身邊，但我無時無刻掛住佢，佢嘅教誨我會傳畀下一代。

姜麗文：我心目中嘅最愛就係爹哋秦沛，多謝佢好尊重我所做嘅任何選擇，最有印象係我同哥哥選擇自資做歌手，當時佢唔開心，但當佢見到我哋用自己努力去做音樂，最後都明白晒！

趙茜：多謝爸爸的教導鼓勵，在我人生分叉路上的支持。細個我想學體育，媽媽不同意，爸爸讓我學，有人找我做模特兒，爸爸就帶我去面試，我夢想是做演員，爸爸說無論做乜都支持。