劉浩龍（師兄）自發表「污糟手論」後，早前已缺席電影首映避風頭，昨日原定隨譚詠麟（阿倫）領軍的明星足球隊練波，最終亦「潛水」冇影。阿倫昨午與黃日華、張兆輝、許志安及范振鋒等到球場練習，期間下起大雨仍無阻一眾球員，快65歲的阿倫不時起腳助攻，成為入波功臣，更帶領球隊贏波。受訪時，阿倫笑言要對師兄「用刑」：「本來諗住將佢放喺地下打手印，最污糟係佢，可能佢太驚冇嚟。其實知佢冇心。（佢有冇交代點解唔嚟？）佢話喺屋企做家務，可能祖兒（容祖兒）罰佢洗痰盂。」

阿倫雖然肚腩凸凸，但球技依然了得！