第十八集《我愛發哥》昨日在《東網巨星》App播出，女星鍾欣潼（阿嬌）難忘獲風度翩翩的男神周潤發開車門，提起此事，發哥即搞笑地向阿嬌追數，開門費盛惠十萬九千七，夠晒風趣！

阿嬌大讚發哥有禮貌之餘又有風度，是港人心目中的男神。

發哥突然開天索價向阿嬌追番開車門貼士，認真風趣！

阿嬌：我咁鍾意發哥係因為一次好偶然嘅機會，我搭的士準備落車嘅時候，咁啱遇到發哥等的士，佢幫我開車門，又好有禮貌對住我笑，印象非常好！我又鍾意睇佢嘅戲，所以好鍾意發哥！

發哥：嗱！上次同你開車門，你都未畀錢我，我記住呀！其實我見你嗰次係你兩姊妹喺金像獎嗰時，我開車門就唔記得，連利息一齊呢，都成十萬九千七，你記住呀！

阿嬌：我想問發哥，由細到大皮膚係咪都係咁黑呢？有冇曬過燈呢？

發哥：你估我係古仔（古天樂）咩？我點解咁黑呢？因為我細細個，我老媽子擠我喺田基嗰度，佢去耕田，我曬啲自然燈嘅，所以曬到咁黑，我已經係黑底，冇辦法變喇！點樣搽啲白油都冇得變，加上依家行山就更加黑，不過呢，我都好想第日好似你咁白淨。

阿嬌：發哥同發嫂點樣可以保持咁恩愛？有冇咩方法教吓路？

發哥：講過啦！就係將阿膠溝啲蜜糖一齊飲，飲你唔死就算你夠運！

風趣男神 平易近人

阿嬌笑住欣賞發哥的風采，事後大讚他搞笑幽默：「我覺得發哥好風趣，同埋覺得佢真係對身邊嘅人好好，就算係唔識嘅人都咁好。」