昨日《東網巨星》App播出第十七集《我愛發哥》，歌手周柏豪對殿堂級男神周潤發的演藝路深感興趣，發哥笑言有興趣學唱歌，計劃80歲後搞個唱！嘩！大家拭目以待！

發哥表示非常Enjoy拍戲的現場感受。

透過《東網》與發哥溝通的柏豪深感榮幸。

柏豪：我鍾意發哥，首先因為同性三分親，黐吓先！大家都係姓周，由細都睇佢嘅電影大，感覺好親切，佢當然好和藹可親，好似好熟嘅人咁，雖然我未見過發哥，但都希望有朝一日可以同佢合照，係我光榮嚟！

發哥：柏豪你都算靚仔，周氏家族有你喺度真係爭光不少喎！你做戲又得，唱歌又得，畀啲心機！

柏豪：發哥！我想問你咁多個電影作品中，你最喜歡邊一個作品？

發哥：你話自己作品呢，我都好鍾意，因為喺現場，除咗導演嗌Action同Cut之後嗰啲唔屬於我嘅，每一個段落，Action之後，個空間就係我嘅，我好Enjoy，因為個空間度只有我同啲對手係主導，無論套戲收唔收，喺現場感受係最Enjoy嘅。

柏豪：發哥！其實你鍾唔鍾意唱歌？

發哥：鍾意！見到你唱歌又跳舞，我不知幾羨慕，我唱得先得，鬼叫我又唔唱得，五音又不齊咩！我會嘅，你等吓，可能退休唔做演員，重新搵Miss Chan Chan、Teresa、曾路得學番十年八載，80零、90歲開個Concert，你慢慢等，我鍾意！

盼工作捕獲集郵

得到前輩回答問題，柏豪大感榮幸，渴望可跟發哥真正見面：「發哥！非常之榮幸，可以同你有呢個溝通，呢個接觸，非常之開心，雖然我哋未親眼親身溝通，但經過呢個訪問、《東網》咁樣溝通，我覺得係榮幸！個個都野生捕獲發哥，我都希望我可以工作中捕獲發哥，希望有機會同你影相，希望可以見到你，多謝發哥！」