前晚影星任達華、吳京及泰國拳霸Tony Jaa出席電影首映，任達華表示拍戲整傷手，要休戰一段時間，先拍兩部愛情片放鬆一下。Tony則High爆耍功夫，豪言想殺入華語市場。

任達華（左起）、Tony及吳京豎拇指讚新片掂。

「半個粉絲」Fiona不抗拒與祖名再合作。

High爆的Tony凌空出招，勁！

任達華、吳京及泰國拳霸Tony Jaa前晚出席主演電影《殺破狼Ⅱ》的首映，有份投資的太陽娛樂老闆周焯華與任達華言談甚歡，薛凱琪（Fiona）、劉心悠、梁漢文、許志安、錢嘉樂、曾國祥及女友王敏奕等都有捧場。

問到是否跟周焯華談湊女經？任達華說：「恭喜晒！電影大賣，家庭又美滿，樣樣都恭喜啦！」並轉話題指自己拍打戲受傷，左手手掌骨裂：「依家好番，醫生話冇藥可以醫，要自己慢慢好，今次拍戲可以話用得最多冰，大家都受傷！（期待開拍《殺III》）呢套等咗10年，希望5年內得啦！等我去拍吓愛情片、拖吓手仔，緩和一下先，依家都接咗兩套。」

Tony表示今次與華籍演員合作愉快，希望多花時間在香港及內地發展，問到想跟誰合作？他說：「周潤發、周星馳、李連杰，但唔知佢哋想唔想呢？（覺得自己同甄子丹、成龍邊個身手好啲？）大家唔同Style，好難比較。」

Fiona自認祖名粉絲

Fiona被問到有傳密友房祖名獲內地「解封」，她直言是開心事，又大讚對方勤力：「佢有歌曲同電影點子，都會第一時間同朋友分享，寫我係佢半個粉絲啦！如果話係一個，佢會好囂。（抗拒再合作？）唔抗拒，之前佢話想拍笑片，話自己好好笑，但我覺得我好笑過佢。（鼓勵佢？）佢係識諗嘅人，適當嘅支持就得。」