湯怡想開甜品舖挑戰糕難度

「美人」湯怡可謂入得廚房出得廳堂，近年愛上整餅的她閒時落手落腳焗曲奇及蛋糕，日前更首次炮製Macaron（馬卡龍），吸引不少好友爭相訂購，好學的她近日鑽研斑蘭蛋糕，湯怡有意開咖啡室讓更多人能品嘗其「手勢」，又自爆曾向師兄謝霆鋒自薦做其曲奇餅店整餅女工，但遭對方以「好辛苦」婉拒，她更希望可以拜對方為師。

湯怡可謂「美食大神」，講得出嘅都整得到！

嗱，第日開舖整甜品，試味唔好就咁舔呀！

斑蘭蛋糕做法
Step 1把蛋黃和蛋白分開，分別整蛋白霜及蛋黃糊。

Step 2：蛋黃糊將蛋黃打勻加入沙糖，用打蛋器攪拌，加入新鮮斑蘭汁、椰漿、小量斑蘭香油及低筋麵粉，再用打蛋器拌勻。

Step 3：蛋白霜先將他他粉倒入蛋白內，再用打蛋器打到起泡，期間將沙糖分三次加入。

Step 4完成蛋黃糊和蛋白霜後，將蛋白霜分兩次倒入蛋黃糊，輕輕攪勻務求令蛋糕較輕身，加入牛油，注意要輕手去拌勻，因為怕蛋白空氣會走，再放入焗爐焗40分鐘。

完成!

湯怡近年醉心鑽研甜品，只要講得出她都整得到！對於被封「美食大神」，湯怡謙虛地說：「唔敢當。」並解釋為何愛上入廚：「讀中學時冇家政堂，所以對呢樣嘢特別有興趣，之後上網睇好多食譜。」原來她的首個蛋糕在一知半解下完成：「唔知打蛋白要打到咩程度就擺入焗爐，出到嚟係好實嘅蛋糕，呢個就係我親手整嘅蛋糕，之後就開始入廚房向媽咪偷師。」

洪卓立＝白老鼠

問到男友洪卓立是否經常做「白老鼠」？湯怡笑說：「算係啦！」隨即大讚自己廚藝：「好食嘅，如果唔係佢點肥肥白白！（有冇投訴你煮得難食？）冇，投訴我太多用具，反而幾鍾意我煮飯，始終外賣唔健康，加上得閒都會煲湯水。（佢食極唔肥？）佢好努力做運動。」問到有否想過開班教整甜品？湯怡說：「做老師要讀好多課程，有證書比較專業先可以教人，暫時興趣比較多。（開舖？）開舖比較長遠，要諗嘅嘢同時間都好多，自己好想買間Cafe，畀人飲吓Tea、食吓蛋糕曲奇餅。」提到謝霆鋒在中環開設曲奇餅店，是否要與大師兄對撼？湯怡說：「我拜佢為師啦！我有問佢可唔可以入去學吓嘢。（自薦過？）佢開舖時我有問過佢。（佢答咩？）佢話食好過入去做，始終佢覺得辛苦。」

Macaron朋友限定

湯怡自認最拿手是整曲奇餅及Macaron：「蛋糕要講賣相，我覺得有好大進步空間，因為蛋糕有好多裝飾，真係要花心思再研究吓。（有冇諗過唔做娛樂圈去外國讀甜品課程？）如果係開舖頭可能考慮一下，暫時我仲好鍾意做戲，做戲可以做到現實中做唔到嘅嘢，好想試同好好玩。」對於早前炮製的Macaron大獲好評，湯怡說：「只限自己朋友，一個人做唔到太多，都幾享受過程，雖然有辛苦，但見到製成品、朋友反應都幾開心。」