《我愛發哥》第15集昨日在《東網巨星》App播出，宅男女神黃翠如向男神周潤發請教行街市攻略！獲發哥風趣回應，翠如興奮得要請發哥到其家中作客，並會炮製海鮮宴侍候偶像！

發哥教翠如行街市買好餸的策略。

翠如以海鮮宴引誘發哥去她家食飯。

翠如：我最鍾意發哥，任何造型都鍾意，就算隨便喺屋企行出嚟都咁型仔！

發哥：我邊夠你男朋友靚仔？你兩個行埋就好睇，我不知幾羨慕你，開心到爆燈，真係男才女貌。（翠如：多謝發哥。）見到都開心！恭喜恭喜！喂！你哋請飲唔好搵我，我唔得閒！（翠如：咁生日會請唔請得你呀？）

翠如：發哥！我想問你去九龍城幫襯開邊檔？我都想去呀！

發哥：呢個問題好難答，我檔檔都Hea吓喎！好似貴利佬咁去收數，我最鍾意等佢哋開飯嗰陣，呢度夾吓，嗰度夾吓，點解一定要呢個鐘數呢？因為街市人煮嘅飯係最好食，佢哋搵啲餸頭餸尾整埋係非常之好食，你屋企冇辦法煮到咁好食。你要去街市，五點零，佢哋收工之前，食完飯就收檔，你五點落去食！一定好好食o架！（翠如：我知呀發哥！我老竇以前喺街市賣魚o架！嚟我屋企食飯，海鮮宴！勁！）

發表愛的宣言

發哥的回覆令翠如冧爆，她更乘機發表「愛的宣言」，笑言發哥去到邊都會繼續追隨！她High爆地說：「我冇諗過，我係可以好似面對面咁睇到你同我講嘢o架！同埋發哥好似我係同你講關於造型，但唔知點解你揸咗隻太空船去咗邊度呢？但唔緊要，你去到邊度我都會跟住你！多謝你呀！多謝你記得我呀！係呀！我係黃翠如呀！Keep住記住我喇！下次見到嘅時候我都要集郵喇！多謝！」