近日做老竇的藝人譚俊彥昨晨到醫院接內地演員太太任祉妍及女兒譚晴出院，譚俊彥挽着BB籃與太太現身，兩人應傳媒要求連咀兩次，甜蜜到爆。譚俊彥表示太太會以人奶餵BB，笑稱自己將會負責夜班，是夜班餵奶師。剛做媽媽的任祉妍表示開刀分娩後康復得很好，傷口也沒感到痛楚，講到老爺狄龍恨抱男孫，她說：「順其自然。」

譚俊彥到醫院接太太及躺在BB籃的女兒出院，期間與太太甜蜜咀嘴。

譚俊彥被問到做老竇心情緊張嗎？他說：「唔緊張，床仔、衫都準備好晒。（學湊BB未？）做咗好耐功課，我就係陪月，可以請我，湊BB各師各法啦！以前主持醫療節目，拍檔就係婦產科醫生。（有冇禁忌？太太唔洗得頭？）其實即刻洗頭都得，以前冇風筒先唔得。（煲湯畀太太補身？）頭一個禮拜就唔可以食魚驚有疤，過一個星期就可以食魚幫助谷奶。」譚俊彥七月會返內地拍劇，這段時間可以全程照顧太太及BB，問拍劇會否捨不得BB？他說：「會呀！呢兩晚已經好唔捨得，夜晚都要開BB相嚟睇，好想快啲帶佢返屋企。」至於狄龍一早探望新抱及孫女後先行回家。