歐陽巧瑩心都離：死亡很接近
馬來西亞旅遊熱點沙巴昨晨發生6級地震，前港姐歐陽巧瑩前日正在當地拍攝旅遊節目，地震時正在酒店房化妝的她同樣感到震動，從未經歷地震的她直言震到個心離一離，事後她拍片報平安，卻仍有餘悸，並留言表示與死亡很接近！
身在沙巴的歐陽巧瑩遇６級地震，驚心又動魄！（資料圖片）
梁彥宗與歐陽巧瑩於地震後繼續拍攝，惟兩人表情肉緊，心情似未平復！
歐陽巧瑩
勇奪《2013年香港小姐》友誼小姐的歐陽巧瑩（Tammy），昨日在馬來西亞與梁彥宗及攝製隊拍攝無綫J2台旅遊節目《3日2夜》，遇上沙巴42年來最強烈的黎克特制6級地震，Tammy等人當時雖身處距離沙巴約兩小時車程的亞庇，但都感受到震動！
梁彥宗「震」咗十秒
Tammy與梁彥宗昨午拍片報平安，身穿吊帶背心的她猶有餘悸，兩人在片段中均似乎不在狀態，Tammy說：「有朋友知我喺馬來西亞拍攝，都好擔心，Message我，我都同屋企人講『我平安無事』，拍攝會繼續進行，希望所有受災害影響人士都能夠平安無事！」梁彥宗則說：「大概朝早7點，我喺酒店房Feel到搖晃，見窗簾、床都喺度搖，維持咗十秒。沙巴唔係經常地震嘅地方，我冇經歷過地震，但睇番啲新聞相，見災區都有天花塌下！」
而Tammy昨午回覆本報並親自報平安，她說：「今朝7點半到，我喺酒店房化緊妝，突然間搖咗一陣，好驚呀！我咁大個女都未遇過地震，都反應唔切。（市面情況點？）我依家身處馬來西亞嘅亞庇，市面平靜，冇見到有路陷，而攝製隊見情況安全都決定繼續拍攝。」她又在Instagram留言表示感覺到死亡：「第一次感受到地震嘅感覺，好似同死亡非常近咁，成間屋都搖咗好幾下，好得人驚，希望冇人有事。」
余曉彤望吉人天相
位於沙巴的神山向來是背包客的旅遊熱點，藝人胡定欣與高鈞賢亦曾到神山為無綫拍攝節目。而女模余曉彤昨日在Facebook透露上周亦到訪沙巴的神山，故對地震大表震驚，她在電話中說：「估唔到一個禮拜後發生啲咁嘅事，希望被困神山者嘅家人、朋友唔使擔心，會吉人天相！」
