第十三集《我愛發哥》昨日在《東網巨星》App播出，與神級影帝周潤發相識多年的張兆輝狂讚好友為人幽默又親切，發哥即回敬對方是國際影帝，自愧不如！問到風趣要訣，發哥搞笑叫輝哥食蔗、油炸鬼及馬蹄爽，多食多趣！

發哥笑言畀張兆輝摑兩巴Firm面，果然好趣！

收到發哥嘅爆「脆」秘訣，張兆輝幾開心！

張兆輝：我同發哥嘅難忘事係發哥教我點影相，教我點捕捉啲嘢，最初佢咩都唔使講，佢話咩都睇，咩都影，之後會睇一輪我影嘅嘢，跟住會教你邊度影得好，邊度影得唔好，我影相都係咁樣學吓學吓學番嚟。

發　哥：你客氣喇輝哥，大家咁熟，你就見外喇！好多嘢你唔識嘅時候，你唔好問我嘛，問你阿太，你阿太見識多過我，影相佢都好叻！（張：影相梗係你叻啦！）

張兆輝：我欣賞發哥嘅嘢就多喇！我想問佢點解咁風趣？點解影相咁叻？點解做戲咁好嘢？點解人咁好？總之好多嘢，都係好好嘅！

發　哥：輝哥，你係國際影星，你咁樣講嘢，擦我鞋？我自卑喎！我都冇拎過國際影帝！真係呀！你兜巴摑我兩巴，唔怪得我塊面咁Firm啦！（張：哎！我掌自己多幾巴！）下次請你食飯飲茶。（張：我請你食飯飲茶呀！）你要風趣好簡單，買多啲油炸鬼，一定脆！食蔗，又咁脆，食多啲馬蹄爽，又脆，你想風趣，食多啲呢啲食物冇錯，一定脆！脆到你唔識講。

收神級回覆喜上眉梢

張兆輝收到發哥的搞笑回覆，開心到笑不攏嘴：「我都話發哥好人啦！我哋真係難得能夠喺天王巨星面對面同佢傾偈喎！大家都好想！難得佢咁用心解答我哋啲問題，希望發哥成日解答我哋啲問題啦！」