影壇新貴王嘉慧參演電影《一個人的武林》等，可惜擁跆拳道黑帶的她仍未能大展拳腳，懂得兩文三語的她以Maggie Q為目標，盼有日從香港影壇「打」到國際！

王嘉慧擁跆拳道黑帶，腳法梗係勁！

有姿勢有實際的王嘉慧，想做打女都唔難！

王嘉慧睇得又打得，甚有潛質！

英皇新人王嘉慧（Jessica）自幼學跆拳道，擁黑帶的她睇得又打得，並以「打女」做目標闖影壇：「中二開始對搏擊等感興趣，細個好鍾意睇武打片、睇李小龍、成龍，又好鍾意莫文蔚、舒淇套《夕陽天使》，我覺得啲好強嘅女仔好有型，所以開始學跆拳道。」她曾參演電影《一個人的武林》及《古惑仔：江湖新秩序》等，不過都未能發揮所長拍動作戲騷真功夫，恨拍打戲的她說：「有人話到你拍就會嗌辛苦，我覺得自己好捱得，好想捱吓！叫我上高山零度拍動作片都得，呢啲都係人哋經歷唔到，既然入到呢行Why Not？做演員就係冇限制。」

唔夠膽同子丹切磋

在《一》片與甄子丹及楊采妮合作，Jessica趁機向前輩學習：「大家會喺現場預早夾表情、溝通，好窩心呢行前輩肯教新人，喺甄子丹身上學嘅唔只武術，係對工作嘅執着、好專業想做好每一個鏡頭，作為新人要學有要求、主見。（同子丹切磋？）冇！邊夠膽。」她稱望與同門師兄謝霆鋒及影后惠英紅合作，很尊敬霆鋒：「有次同佢傾偈，先知佢除咗拍動作戲，都考咗牌做詠春導師，佢真係做得好好，好值得學習。」

視Maggie Q為目標

曾就讀國際學校的Jessica，操得一口流利的中、英文外，更學過法文、德文和西班牙文，她希望以Maggie Q為目標，盼有日能衝出香港，打入內地與國際：「我簽約英皇後返內地多，英文都屬於我母語，學校朋友都係電影系畢業，我覺得有機會去（荷里活）學吓嘢都好。」