「小巨肺」林欣彤（Mag）無懼同公司有眾多歌手分薄資源，更謂有機會想再跟「一姐」容祖兒學習，但不想跟她比較：「我嘅目標永遠都係要成為一個更好嘅林欣彤，而唔係成為第二個邊個。」實現了歌手夢想的Mag希望未來憑着音樂貢獻社會，以至世界。

林欣彤坦言有機會想再跟「一姐」容祖兒學習，但不想與她比較。

愛心爆棚的林欣彤，歷年來參與不少慈善活動。

容祖兒

於2011年正式簽約英皇進軍樂壇的林欣彤（Mag），轉眼間已經入行四年，談到公司雲集眾多一哥一姐，曾跟師姐容祖兒（Joey）合唱《追風箏的風箏》的她坦言，有機會想再跟Joey「偷師」：「因為直接有首合唱歌喺佢身上，或者試過同台演出嘅時候，我覺得我吸收嘅嘢好多，我可以望到自己有咩可以向佢學習，佢係一個喺我未做歌手之前、喺我音樂領域裏面影響好大嘅女歌手，自己一向都鍾意聽佢嘅歌。」

問到可會視Joey為目標？只會跟自己比較的她直言沒有定誰是目標：「我嘅目標永遠都係要成為一個更好嘅林欣彤，而唔係成為第二個邊個。」

集中音樂發展

談到現時唱片公司是英皇，但經理人公司則是TVB，Mag坦言未有想過轉去同一間公司：「遲啲先算，呢刻喺邊間公司就盡力做好本分，暫時冇諗呢個問題。」她坦言跟現時公司合作得很愉快，公司很尊重其音樂上的意見，至於問到英皇如此多歌手，可會擔心分薄資源？她坦言冇有怕：「我覺得唔係淨係單一公司會係咁，喺成個樂壇都需要好多唔同歌手，我相信肯努力會得番應有嘅Support。」

談到今年工作大計，她表示集中音樂發展，早前推出了今年首支主打歌《我們都是這樣長大的》，歌曲講到對理想的追求：「由細到大理想係做歌手，依家實踐咗，追尋到個人榮譽，就想諗點樣可以對社會或者世界有影響，令呢個理想有更深層嘅意義，所以嚟緊理想係將自己貢獻出嚟，例如我今年去咗饑饉個Trip，就係其中一個方法。」

參與慈善活動

致力貢獻社會的Mag原來自小已經愛心爆棚，中學時曾參加義工課外活動，如到屋邨舉辦攤位遊戲、照顧智障小朋友等：「中四嗰陣就諗慳啲零用錢嚟助養小朋友，助養到依家就嚟十年，未見過佢，有機會想去非洲探佢。」

今年Mag亦參與了不少慈善活動，例如早前的「饑饉三十」，問到心願可會是成立慈善機構？她則謂以前有想過成立流浪狗之家或戒煙中心：「但呢啲都係後話，首先依家有咩就做到咩先係最直接，做善事係即刻做到咩就做咗先。」